նախընտրելի դարձնելԼեռնային Ղարաբաղի Հանրապետության նախագահի երդմնակալության արարողությունը կկայանա սեպտեմբերի 7-ին` Ստեփանակերտի մշակույթի եւ երիտասարդության տան մեծ դահլիճում:
Ինչպես NEWS.am-ին հայտնեցին ԼՂՀ խորհրդարանի մամուլի ծառայությունից, խորհրդարանի խոսնակի որոշմամբ սեպտեմբերի 7-ին կկայանա Ազգային ժողովի հատուկ նիստ, որը նվիրված կլինի Լեռնային Ղարաբաղի Հանրապետության նախագահի պաշտոնն ստանձնելուն:
Խորհրդարանի հատուկ նիստից հետո Ստեփանակերտի Վերածննդի հրապարակում ԼՂՀ Պաշտպանության բանակը ռազմական հանդիսավոր շքերթ կանցկացնի` նվիրված նախագահի երդմնակալությանը:
Հիշեցնենք, նախօրեին Բակո Սահակյանն այցելել էր ԿԸՀ, որտեղ նրան հանձնել էին ԼՂՀ նախագահի վկայականը:
Ավելի վաղ NEWS.am-ը հայտնել էր, որ ԼՂՀ-ում հուլիսի 19-ին տեղի էին ունեցել նախագահական ընտրություններ:
Մեծ առավելությամբ հաղթել էր պետության գործող նախագահ Բակո Սահակյանը` հավաքելով ձայների 66,7%-ը (47095 ձայն): ԼՂՀ Ազգային ժողովի անկուսակցական պատգամավոր Վիտալի Միխայիլի Բալասանյանը ստացել էր ձայների 32,5 տոկոսը կամ 22 հազար 966 ձայն: Հայաստանի պետական ագրարային համալսարանի Արցախի մասնաճյուղի գիտաուսումնական գծով պրոռեկտոր Արկադի Իվանի Սողոմոնյանն էլ ստացել էր ձայների 0,8 տոկոսը կամ 594 ձայն: Ընտրողների մասնակցությունը կազմել էր 73,43%:
