նախընտրելի դարձնել
ԵԱՀԿ անդամ 19 երկրների մշտական ներկայացուցիչներ Հայաստանում եւ Ադրբեջանում իրավիճակի դիտարկում կանցկացնեն:
ԵԱՀԿ ներկայացուցիչներն արդեն գտնվում են Երեւանում եւ հանդիպել են Հայաստանի նախագահ Սերժ Սարգսյանի հետ:
Սեպտեմբերի 10-11-ին նրանք կայցելեն Բաքու: Այցելությունների շրջնակներում նրանք հանդիպումներ կունենան կառավարությունների, քաղաքական ուժերի, քաղաքացիական հասարակության ներկայացուցիչների հետ:
ԵԱՀԿ ներկայացուցիչների տարածաշրջան այցի նպատակն է ծանոթանալ իրավիճակին եւ կարծիքներ փոխանակել այստեղ ընթացող գործընթացների մասին:
Նշենք, որ ԵԱՀԿ ներկայացուցիչների ավելի վաղ նախատեսված այցելությունը համընկավ տարածաշրջանի հանդեպ հետաքրքրության մեծացման հետ: Մասնավորապես, անհանգստության առիթ է դարձել վերջերս Ռամիլ Սաֆարովի էքստադիցիայից եւ ներում շնորհվելուց հետո ստեղծված իրավիճակը:
2004 թվականի փետրվարին Սաֆարովը Բուդապեշտում կացնահարել էր քնած հայ սպա Գուրգեն Մարգարյանին, որից հետո հունգարական դատարանի կողից դատապարտվել էր ցմահ ազատազրկման: Երկու սպաներն էլ անգլերենի դասընթացներ էին անցնում ՆԱՏՕ-ի «Գործընկերություն հանուն խաղաղության» ծրագրի շրջանակներում: Այս տարվա օգոստոսի 31-ին Հունգարիան Ադրբեջանին հանձնեց Ռամիլ Սաֆարովին, ում Բաքու հասնելուն պես ներում շնորհվեց եւ նա ազատ արձակվեց:
Հունգարիայի եւ Ադրբեջանի իշխանությունների այս գործողությունները վրդովմունքի ալիք առաջացրեցին ոչ միայն հայկական կողմի, այլեւ միջազգային հանրության մոտ:
