ԱՄՆ-ում Իրավաբանների հայկական կոլեգիան նամակ է հղել նախագահ Բարաք Օբամային` Ռամիլ Սաֆարովի արտահանձնման եւ հետագա ներման  կապակցությամբ: Այս մասին հայտնել է «Ասպարեզը»:

Իրավաբանների հայկական կոլեգիայի նամակում մասնավորապես ասվում է.

«Թեեւ Ձեր` Ադրբեջանի իշխանությունների կողմից Սաֆարովին շնորհված ներման կապակցությամբ արտահայտած  հիասթափությունը ողջունելի է, սակայն մենք հուսով ենք, որ Ձեր կողմից ավելին կասվի եւ կարվի, հաշվի առնելով, որ վիրավորանք է հասցվել միջազգային իրավունքին եւ հիմնարար հասկացություններին:

Մենք Ձեզ խնդրում ենք հետեւել ձեր խղճին  եւ արդարամտությանը, որոնց շնորհիվ դուք արժանացել եք այս բարձրագույն պաշտոնին, ինչպես նաեւ միլիոնավոր ամերիկացիների, այդ թվում ամերիկյան հայերի աջակցությանը:

Սաֆարովին ներում շնորհելու Ալիեւի որոշումը նշանակում է հրաժարում տարածաշրջանում խաղաղություն հաստատելու եւ լարվածությունը նվազեցնելու անձամբ Ձեր եւ ԱՄՆ-ի ջանքերից:

Այս շաբաթվա ընթացքում, երբ դուք կընդունեք Դեմոկրտական կուսակցության նշանակումը եւ, ինչպես սպասվում է, ժողովրդի հետ կկիսվեք օրենքի գերակայության կարեւորությամբ, եւ աշխարհին կհիշեցնեք  այն մասին , որ Ամերիկայի Միացյալ Նահանգները հանդիսանում է ազատության եւ ժողովրդավարության ջատագով, մենք խնդրում ենք Ձեզ առիթից օգտվել եւ մտորել այն մասին, թե այդ հայտարարությունները ինչպես  կհամաձայնեցվեն  Ադրբեջանական ռեժիմի հետ ներկայիս բարեկամական  հարաբերությունների հետ:

Մենք Ձեզ կոչ ենք  անում հանդես գալ որպես խիզախ առաջնորդ, ում համար արդարությունը բարձր է ամեն ինչից եվ ամենքից»:

Ադրբեջանցի զինծառայոց Ռամիլ Սաֆարովը, ով 2004 թ-ին Հունգարիայում ՆԱՏՕ-ի` «Համագործակցություն հանուն խաղաղության» ծրագրի շրջանակներում տեղի ունեցող անգլերեն լեզվի դասընթացի ժամանակ կացնահարել է հայ սպա Գուրգեն Մարգարյանին եւ  ցմահ ազատազրկման էր դատապարտվել Հունգարիայի դատարանի կողմից,  2012 թ-ի օգոստոսի 31-ին Հունգարիայից արտահանձնվել է Ադրբեջան, որտեղ նրան ներում են շնորհել եւ բարձրացրել են զինվորական կոչումը: