Հայաստանում տեղակայված 102-րդ ռազմակայանի հարյուրից ավելի ռուս զինվորներ ժամանել են  «Մարշալ Բաղրամյան»  պոլիգոն` մասնակցելու ՀԱՊԿ Արագ արձագանքման հավաքական  ուժերի «Փոխգործակցություն-2012» ուսումնավարժանքներին, որոնք տեղի կունենան 2012թ. սեպտեմբերին Հանրապետության տարածքում:

Ինչպես հաղորդեցին Հարավային ռազմական շրջանի մամուլի ծառայությունից, ռուս զինծառայողները տաղավորվել են բանակային ճամբարում, որտեղ, բնակելի հատվածներին զուգահեռ, գտնվում են մարզահրապարակներ, լվացարանա-ցնցուղային հատվածներ, լվացքա-լոգարանային համալիր, զուգարաններ, սննդի կետ, անգամ ամառային սրճարան:

Զինծառայողների համար կստեղծվի շարժական կինոթատրոն, նախատեսված են նաեւ հայ ստեղծագործական խմբերի ելույթներ:

Մասնակիցների համար կկազմակերպվեն նաեւ հայկական ազգային խոհանոցի օրեր. նրանք կարող են համտեսել խորոված, լուլա-քեբաբ, տոլմա, բոզբաշ, խաշ եւ այլն: Զինվորների եւ սպաների խոսքով` ընդունելությունը շատ ջերմ էր, նրանք գոհ են կենցաղային պայմաններից: Ճամբարում կտեղակայվեն ընդհանուր թվով շուրջ 2 հազար զինվորականներ:

ՀԱՊԿ ԱԱՀՈՒ ուսումնավարժանքները Հայաստանում կանցկացվեն սեպտեմբերի 15-19-ը:  Հիմնական թեման կլինի պայմանական հակառակորդի հարձակման դեպքում ՀԱՊԿ անդամ երկրների միացյալ զորքերի գործողությունները եւ հակահարձակման անցնելը: