ԱՄՆ դատարանը սեպտեմբերի 7-ին որոշում է կայացրել հօգուտ Գլենդել քաղաքի ոստիկանական դեպարտամենտի եւ նրա երկու աշխատակցի, որոնց նկատմամբ դատական հայց էր ներկայացրել  72-ամյա Ասատուր Միրզոյանը: Նա պնդում էր, թե ոստիկաններն իրեն ձերբակալելիս իր նկատմամբ ոչ համաչափ ուժ են կիրառել եւ կոտրել ձեռքը:

Ինչպես հաղորդում է  «Glendale News-Press»-ը, երդվյալ յոթ ատենակալները որոշում են կայացրել` գործով անցնողների ցուցմունքները երեք օր շարունակ լսելուց հետո:

Ինչպես ավելի վաղ տեղեկացրել էր  NEWS.am-ը, Գլենդելի բնակիչ Ասատուր Միրզոյանը  սեպտեմբերի 5-ին դատարանում վկայություն է տվել այն մասին, որ ոստիկանության երկու աշխատակիցներ երկու տարի առաջ  անհամաչափ ուժ են կիրառել իր նկատմամբ  «Glendale Galleria» առեւտրի կենտրոնում` պատճառելով մարմնական վնասվածք, հաղորդում է «Glendale News-Press»-ը:

Նա ասել է, թե այդ օրը ընկերոջ հետ գնացել է առեւտրի կենտրոն, հանդիպել մյուս ծանոթին այնտեղ, որը նրանց հետ կես գավաթ լիկյոր է խմել: Ըստ Միրզոյանի` դուրս գալիս ոստիկանները, որոնք քաղաքացիական են հագնված եղել, մի քանի անգամ նրան խնդրել են լքել խանութը, բայց որպես ոստիկան չեն ներկայացել: Հետո ոլորել են ձեռքերը եւ կոտրել դաստակը. Միրզոյանը գիտակցության է եկել հիվանդանոցում:

Միրզոյանը ձերբակալվել  եւ մեղադրվել է նրանում, որ հարբած վիճակում գտնվել է հասարակական վայրում եւ դիմադրություն է ցույց տվել ձերբակալության ժամանակ: Նա հայտարարել է մեղադրանքը չվիճարկելու ցանկության մասին եւ ստիպված է եղել ներման խնդրագիր ստորագրել: