նախընտրելի դարձնելԵԽԽՎ Վենետիկի հանձնաժողովի նախագահ Ջաննի Բուքիքիոն նամակ է հղել Հայաստանի Սահմանադրական դատարանի նախագահ Գագիկ Հարությունյանին` նշելով, որ խորապես կիսում է վրդովմունքը կապված վերջերս տեղի ունեցած դեպքերի հետ:
Բուքիքիոն նշել է, թե ամբողջությամբ միանում է Եվրոպայի Խորհրդի Գլխավոր քարտուղարի` այս առնչությամբ ողջ կազմակերպության անունից արած հետեւյալ հայտարարությունը. «Ռամիլ Սաֆարովը մեղադրվել էր սպանության համար եւ դատապարտվել ցմահ բանտարկության Հունգարիայում: Սույն թվականի օգոստոսի 31-ին նա տեղափոխվեց Ադրբեջան եւ անմիջապես նրան ներում շնորհվեց: Ես որեւէ կերպ չեմ ցանկանում տրամադրել մեկնաբանություններ իրավական ընթացակարգերի վերաբերյալ, սակայն գտնում եմ, որ անընդունելի է, որ դատապարտված մարդասպանին տրվում է հերոսի կարգավիճակ: Ես հրաժարվում եմ ընդունել աշխարհի այնպիսի հայեցակարգ, որի բարոյական հիմքերը սասանվում են, որում մարդկային արժանապատվությունը ժխտվում է: Սա այն Եվրոպան չէ, որը Մենք պետք է թողենք մեր ապագա սերունդներին: Ես խստագույնս դատապարտում եմ հանցագործությունների նմանատիպ փառաբանումը եւ կոչ եմ անում բոլորիս աշխատել միասնաբար, որպեսզի կարողանանք ապահովել կյանքի իրավունքի հանդեպ հարգանքը, ինչպես նաեւ այն արժեքների պաշտպանությունը, որոնք քարոզում է Եվրոպայի Խորհուրդը»:
