նախընտրելի դարձնել
«Մահմեդականների անմեղությունը» ֆիլմի հեղինակներից մեկին`Նակուլա Բեսլի Նակուլային Քալիֆորնիայում կանչել են հարցաքննության` դատվածությունից հետո փորձաշրջանի կանոնները խախտելու համար:
Ավելի վաղ NEWS.am-ը հաղորդել էր, որ Associated Press-ի լրագրողները նախկինում բացահայտել էին, որ ֆիլմի ռեժիսորը հրեա Սեմ Բեյսիլ անունով մեկն է, ում որպես ուրվական էին բնորոշել: Նրանք պարզել էին, որ այս անվամբ հանդես է գալիս ոմն Նակուլա Բեսսլի Նակուլան:
Ինչպես բացահայտել են ամերիկյան Gawker պարբերականի լրագրողները, Նակուլա Բեսլին եղել է ֆիլմի պրոդյուսերը, իսկ ֆիլմը նկարահանել է Ալան Ռոբերթս անունով մեկը, ով հայտնի է մեծահասակների համար նախատեսված ֆիլմերի իր մեծ փորձով:
YouTube-ում հոլովակի ի հայտ գալուց հետո դերասաններից ոմանք հայտարարել են, որ իրենց հրավիրել են նկարահանվել հին արեւելքի մասին «Անապատի զինվորը» անունով ֆիլմում եւ որ սցենարում Մուհամեդ մարգարեի անունը ոչ մի անգամ չի նշվել: Այդ ամենը հայտնվել է հետնկարահանման աշխատանքների ժամանակ: Նակուլան չի հերքում ֆիլմի ստեղծման աշխատանքների իր մասնակցությունը, սակայն պնդում է, որ ինքը չէ ռեժիսորը, թեեւ անձամբ ճանաչում է նրան:
Լրագրողները բացահայտել են, որ 2010 թ. Նակուլան Քալիֆորնիայում 21-ամսյա ազատազրկման եւ մոտ 800 դոլարի տուգանքի էր դատապարտվել` բանկի նկատմամբ խարդախության համար: Նա 5 տարի իրավունք չուներ օգտվել համակարգչից կամ համացանցից
YouTube-ում ֆիլմի հայտնվելուց հետո մահմեդական մի շարք երկրներում բողոքի ակցիաներ եւ անկարգություններ են սկսվել, որոնց արդյունքում մարդկային զոհեր եւ տուժածներ կան:
