Ադրբեջանի վերաբերյալ Եվրախորհրդարանի բանաձեւը, անկասկած, օբյեկտիվության եւ արդարության ուղղությամբ կարեւոր քայլ է: Այս մասին «Analitika.at.ua»-ի հարցազրույցում ասել է Ռուսաստանի ԳԱ արեւելագիտության ինստիտուտի գիտաշխատող  Ստանիսլավ Իվանովը:

Նա զարմանք է հայտնել այն փաստի կապակցությամբ, որ  բանաձեւը ոչ բոլոր պատգամավորներն ու երկրներն են պաշտպանել: «Եթե Բաքվի արձագանքը մարդասպանի արտահանձնմանը կանխատեսելի էր,  ապա հունգարական իշխանությունների գործողությունները դժվար է հասկանալ: Ինչով էին նրանք ղեկավարվում`  նման սադրանքի գնալով: Հունգարիան բավականին խոշոր եվրոպական երկիր է, որն ունի անհրաժեշտ հետախուզական եւ վերլուծական ծառայություններ եւ բավական լավ գիտի Ալիեւի իրական դեմքը:

Ուստի պետք է դատապարտել ոչ միայն ադրբեջանական գործողությունները, այլեւ  հունգարական իշխանություններին»,- հայտարարել է  փորձագետը: Նա նաեւ իր կարծիքն է հայտնել ղարաբաղյան կարգավորման բանակցային գործընթացի վերաբերյալ:

«Ի՞նչ խաղաղ կագավորման մասին կարող է խոսք լինել սպառազինությունների մրցավազքի, Թուրքիայի, Իսրայելի եւ ԱՄՆ օգնությամբ Աղրբեջանի արագացված միլիտարիզացիայի  եւ պրն Ալիեւի, ինչպես ինքն է ասում, Ստեփանակերտում իր քաղաքացիների հետ բանակցություններ վարել չցանկանալու պարագայում»,-ասաց Իվանովը` ավելացնելով, որ  «չնայած Սաֆարովի արտահանձնման մասին ընդհանուր առմամբ դրական բանաձեւին, Եվախորհրդարանը նմանվում է ոչ ավելի, քան քննարկման հարթակի, եւ իր մեղմաշունչ բանաձեւերով չի կարող բոլոր հարցերին պատասխան տալ` կանխելու համար տարածաշրջանում նոր բռնության բռնկումը: Ստեղծված իրավիճակում թե Հունգարիան, թե Եվրախորհրդարանը պատասխանատվություն են կրում Բաքվի սադրիչ գործողությունների համար»: