Լիբիայում ԱՄՆ-ի դեսպանի սպանությունը կարող է հայտարարվել որպես համոզիչ վկայություն ծայրահեղական ահաբեկչական  խմբակցությունների գոյության, որոնք սպառնում են խաղաղությանն ու կայունությանը: Այդ մասին NEWS.am-ի թղթակցի հետ զրույցում հայտարարել է  Միջազգային եվրասիական շարժման ղեկավար Լեոնիդ Սավինը:

Ըստ նրա` Վաշինգթոնը տարբեր կերպ կարող է օգտագործել իրավիճակը:

Ի պատասխան այն հարցին, թե ով է կանգնած Լիբիայում, Եգիպտոսում, Թունիսում եւ Եմենում բողոքի ակցիաների հետեւում, քաղաքագետը նշել է, որ  ակտիվ շարժիչ ուժ է հանդիսանում այդ երկրների մահմեդական երիտասարդությունը: Ակցիաները հիմնականում ինքնաբուխ են  եղել, սակայն որոշների աշխատանքը թեժացրել են լրատվամիջոցները: Օրինակ, Կահիրեում դրանք ուղիղ եթերով են հեռարձակվել:

Խոսելով «Մահմեդականների անմեղությունը» ֆիլմի մասին` Սավինը նշել է, որ բողոքող հասարակություններում բավականի պայթյունավտանգ սոցիալական իրավիճակ է:  ԱՄՆ-ն ծայրահեղ վիճակում է, քանի որ ֆիլմն արվել է այդ երկրում: «Google ընկերությունը եւս, որը վերահսկում է YouTube-ը, մասնակից է տեղեկատվության տարածմանը»:

 Իսկ ի պատասխան այն հարցին, թե արդյոք այդ ակցիաները չեն հանգեցնի արաբական երկրների պաշտոնապես միավորմանը, Սավինը նշել է. «Հազիվ թե: Տարածաշրջանային խաղացողները շատ հակասություններ ունեն»: