Ավարտվել է հյուսիսամերիկյան ամենախոշոր կինոփառատոններից մեկը, որի 11 օրերի ընթացքում ցուցադրվել են ավելի քան 50 երկրների  372 ֆիլմ: Տորոնտոյի կինոփառատոնի յուրահատկությունը կայանում է նրանում, որ այստեղ չկա պրոֆեսիոնալ ժյուրի. գլխավոր մրցանակակիրը որոշվում է հանդիսատեսի ձայների շնորհիվ:

Բարձրագույն People`s Choice մրցանակին արժանացել է  Դեւիդ Ռասելի «Իմ ընկերը խելագար է» ֆիլմը: Սցենարի հիմնված է  Մեթյու Քուիկի համանուն վեպի վրա, որտեղ նկարագրվում է, թե ինչպես  է նախկին ուսուցիչը ութ ամիս հոգեբուժարանում  բուժվելուց հետո  վերադառնում ծնողների տուն:

Տորոնտոյի մյուս մրցանակները նույնպես անդրադարձել են խելագարության եւ սոցիոպատիայի թեմաներին, օրինակ գլխավոր մրցանակներից մեկը ստացել է Մարտին Մակդոնահի «7 հոգեկան հիվանդներ» ֆիլմը, իսկ վավերագրական  կինոյի ոլորտում լավագույնն է ճանաչվել Ջարեդ Լետոյի  «Արտեֆակտ» ֆիլմը:

Տորոնտոյի կինոթառատոնի ժամանակ տեղի է ունեցել Ջո Ռայթի «Աննա Կարենինա»  նոր էկրանավորման պրեմիերան, որի գլխավոր հերոսուհուն մարմնավորել է Կիրա Նայթլին: Չնայած  կինոքննադատները դրական են գնահատել աշխատանքը, սակայն  ֆիլմը դեռեւս մրցանակների չի շահել: