նախընտրելի դարձնել
Սպիտակ տանը ոչինչ չեն լսել սպանված ամերիկյան դեսպան Քրիս Սթիվենսի վերաբերյալ ռուս կոմունիստների առաջնորդ Գենադի Զյուգանովի արտահայտությունների, ինչպես նաեւ դրանց կապակցությամբ իրենց խիստ արձագանքի մասին: Սպիտակ տան ներկայացուցիչ Ջեյ Քարնին հանկարծակիի է եկել` այդ մասին լսելով ճեպազրույցի ընթացքում:
«Ես այդ մասին առաջին անգամ եմ լսում: Ես ոչինչ չգիտեմ այդ մասին, ինձ ոչ ոք ոչինչ չի հայտնել», - ասել է Քարնին, գրում է «ՌԻԱ Նովոստին»:
Այդպիսով, նա հերքել է ռուսական «Կոմերսանտ» թերթի աղբյուրների տեղեկությունները, որ Զյուգանովին խիստ պատժամիջոցներ են սպասվում:
Ինչպես ավելի վաղ հայտնել էր NEWS.am-ը, «Կոմերսանտ» թերթը, վկայակոչելով իր աղբյուրներին հայտնել էր, որ ռուս կոմունիստների ղեկավար Գենադի Զյուգանովին սպասվում է խիստ պատիժ Բենգազիում սպանված դեսպանի մասին խոսքերի համար:
Հիշեցնենք, որ Զյուգանովն իր միկրոբլոգում գրել էր, որ դիվանագետին «սպանել էին վերջին շան պես»: Ըստ Զյուգանովի` «լիբիական հեղափոխության գլխավոր մասնագետը» արդյունքում «հնձել է այն, ինչ ցանել է»:
