Սահմանապահ «Արքանքերգեն» ուղեկալում զոհվածների հարազատները դիակների արտաշիրմում են պահանջում: Այդ մասին Ալմաթիում կայացած մամուլի ասուլիսում հայտնել է ծառայակիցների սպանության մեջ մեղադրվող Վլադիսլավ Չելախի պապ Վլադիմիրը:

Նրա խոսքով` նման պահանջ ներկայացնող ծնողները վստահ չեն, որ իրենց զավակներին  են թաղել: Այժմ զոհերի հարազատները մտադիր են մնացորդների անկախ փորձաքննություն անցկացնել` զոհերի ինքնությունը ճշտելու համար:

Ինչպես ավելի վաղ հայտնել էր NEWS.am-ը,  Չինաստանի սահմանի մոտ գտնվող  «Արքանքերգեն» ուղեկալի միջադեպը տեղի էր ունեցել մայիսի վերջին: Այն գտել էին այրված, իսկ զինվորականներին` մահացած (հայտնաբերվել էր 14 մարմին): Բացի դրանից,  ոչ հեռու գտնվող որսորդական տնակում հայտնաբերվել էր որսորդի դիակը: 

Հունիսի 4-ին հայտնի էր դարձել միակ ողջ մնացած սահմանապահ Վլադիսլավ Չելախի ձերբակալման մասին, որը հետագայում խոստովանել էր սպանությունը:  Նա մեղսունակ էր ճանաչվել, սակայն հոգեբուժական փորձաքննության ավարտից հետո հրաժարվել էր պետական պաշտպանից եւ փոխել էր ցուցմունքները: Չելախը հայտարարել էր, որ սպանության խոստովանությունն իրենից կորզել են բռնաբարության  սպառնալիքով, իսկ իրականում ուղեկալի վրա հարձակվել էին անհայտ անձինք: 

Սահմանապահ ուղեկալում 14 սամանապահներից 11-ի մարմինները հանձնվել էին հարազատներին դեռեւս հունիսի 9-ին: 3 մարմնի ինքնությունը պարզել չէր հաջողվել: Մնացորդներն ուղարկել էին Գերմանիա փորձաքննության: Արդյունքները մինչ այժմ հայտնի չեն, հայտնում է «lenta.ru»-ն:

Փորձագետների ձգվող լռությունը, ինչպես նաեւ Չելախի գործում անհամապատասխանությունները զոհվածների հարազատների շրջանում կասկած է հարուցել, որ իրենց կարող էին  թաղման համար օտար մարդկանց մարմիններ տրամադրել: