Դրախտային Խորհրդային Հայաստանը  «անկախության» տարիներին վերածվել է ամոթի եւ չքավորության օրրանի: Հայաստանի կոմունիստական կուսակցության Կենտկոմի առաջին քարտուղար Ռուբեն Թովմասյանն այսպես է պատասխանել NEWS.am-ի թղթակցի` Անկախության տարիների վերաբերյալ տպավորությունները հայտնելու խնդրանքին:

«Ոչ մի բնագավառ որեւէ առաջընթաց չի գրանցել, ընդհակառակը: Կորցրել ենք ավելին, քան ձեռք ենք բերել: Արդյունաբերությունը քայքայված է, շինարարությունը` նույնպես: Արտագաղթ, գործազրկություն…  Ո՞վ մտածեց խորհրդային տարիներին խնայողությունները կորցրած 500 հազար թոշակառուների մասին: Նրանք դա տնտեսել էին սեւ օրվա համար, իսկ այժմ թոշակառուն չի կարող նույնիսկ  արժանապատիվ կենցաղն ապահովել, ուր մնաց թե խնայողություններ անի», - ասել է Թովմասյանը:

Ըստ նրա` այժմ երկրի ղեկավարությունը խոսում է սոցիալական փաթեթի մասին, որը խորհրդային ժամանակների սոցիալական ծրագրերին անգամ մոտ էլ չի:  Խոսում են կուտակային կենսաթոշակային ֆոնդի մասին: Ո՞վ դրան կհավատա, հիշելով, թե ինչպես են այրվել խորհրդային գանձարանները:  «Գիտություն… մենք հասել էինք  տիեզերք, իսկ այժմ կորցրել ենք ամեն ինչ: Խորհրդային Հայաստանում 13 պետբուհերում անվճար սովորում էին 60 հազար ուսանողներ: 10 հազար մարդուց 190-ն ուսանող էին, դա այն դեպքում, երբ Բրիտանիայում 95 էր, Գերմանիայում` 96, Ճապոնիայում` 149, Ֆրանսիայում` 165: Ուսանողների մեծ մասը կրթաթոշակ էր ստանում, աշխատանքով ապահովվում:  Երկաթուղին ամեն օր բեռնաթափում էր 4 հազար վագոն ապրանք: Իսկ այժմ արժեզրկում է եւ բարձիթողի վիճակ», - ընդգծել է Կոմկուսի ղեկավարը:

Ըստ Ռուբեն Թովմասյանի` անկախության ձեռքբերումներն ամենից լավ գնահատել է բանաստեղծ Համո Սահյանը, որն սկզբում Հայաստանն ավերած առաջին նախագահ Լեւոն Տեր-Պետրոսյանի վստահված անձն էր: «Թակել հարեւանի տան դուռը, խնդրել  սերմնացան սովը մարելու համար: Ավելի լավ է կախվել այդ անկախության պարանով: Ավարայրի դրախտը մենք վերածել ենք խարանի, որն անփառունակ տվել ենք  ամբոխի ապականմանը»: