Հարի Փոթերի հեղինակ Ջոան Ռոուլինգը վաճառում է Էդինբուրգի տունը, որտեղ գրվել են ողջ  աշխարհի երեխաների սիրելի հերոսի`  երիտասարդ հրաշագործի մասին 7 գրքերից 4-ը:

Տունը, որտեղ իր ամուսնու եւ երեք երեխաների  հետ բնակվել է Ռոուլինգը, բաղկացած  է 8 ննջասենյակից, նկարչության սենյակից, փայտե ձեղնահարկից եւ գրադարանից: Շինությունը հսկողության բարդ համակարգ ունի, իսկ հյուրսենյակի գաղտնի մուտքը տանում է դեպի ծառաների սենյակ, հաղորդում է ՆՏՎ-ն:

Տան շուրջը մանկական խաղահրապարակով եւ լճակով այգի է սփռված:

Ինչպես հաղորդում է Telegraph-ը, Ռոուլինգը տունը մաս-մաս է գնել: Փոթերի մասին առաջին գրքի հաջողությունից հետո գրողը ձեռք է բերել առանձնատան երկրորդ հարկը` 425 հազար ֆունտով: Այնուհետեւ, երբ գրքերը նրան  մեծ կարողություն են բերել, Ռոուլինգը կարողացել է տունն ամբողջությամբ գնել: Դրանից հետո տունը դարձել է Հարի Փոթերի երկրպագուների ուխտագնացության վայր, ինչն էլ ստիպել է գրողին տանը հսկողության բարդ համակարգ հաստատել:

Ինչպես հաղորդում է ԻՏԱՌ-ՏԱՍՍ-ը, ներկայումս Ռոուլինգը բնակվում է Էդինբուրգի Բարնտոն արվարձանում գտնվող տանը, որը ձեռք է բերել 2 միլիոն ֆունտ ստերլինգով:

Բարնտոնի առանձնատնից բացի Ջոան Ռոուլինգը ունի նաեւ գյուղատնտեսական կալվածք կենտրոնական Շոտլանդիայի  Պերտ քաղաքի տարածքում եւ տուն` Լոնդոնում: