Սենկակու  վիճահարույց կղզիների եւս մեկ հավակնորդ` Թայվանը, մի ամբողջ նավատորմ է ուղարկել կղզիների մոտ: Տասնյակ ձկնորսական նավեր 6 նավերի ուղեկցությամբ մտել են Սենկակու կղզիների տարածքային ջրեր:

Kyodo գործակալությունը հաղորդում է, որ  ներկայումս  նկատվել են 40-50 ձկնորսական նավ: Նախօրեին հաղորդվել էր, որ  թայվանական 70-ից ավելի ձկնորսական նավեր ուղեւորվում են դեպի վիճահարույց Սենկակու կղզիներ:

Նախօրեին Չինաստանից 3 նավ մտել էին Ճապոնիայի տարածքային ջրեր, հայտնում է «Ռոսբալտը»:

Դյաոյուդաո կղզիախմբի շուրջ վեճը, որը Պեկինում համարում են չինական տարածք,  շարունակվում է 1970-ականներից:

Հակամարտությունն ավելի թեժացավ, երբ սեպտեմբերի 11-ին ճապոնական կառավարությունը մասնավոր սեփականատերից գնեց 5 կղզիներից 3-ը: ՉԺՀ-ն Տոկիոյից պահանջել էր չեղյալ համարել այդ որոշումը: Դրանից հետո Չինաստանում սկսվել էին հակաճապոնական ելույթներ, ճապոնական մի շարք ընկերություններ ստիպված են եղել անկարգությունների պատճառով դադարեցնել իրենց գործունեությունը  Չինաստանում: Տարածքներին հավակնում է նաեւ Թայվանը: