Կանայք տղամարդկանցից միջինը 5 տարով երկար են ապրում: Ըստ վարկածներից մեկի` տղամարդկանց կյանքը կրճատում է տեստաստերոնը` ագրեսիվության եւ տղամարդկության հորմոնը:

Այս հիպոթեզն ապացուցվել է փորձով: Նկատվել էր, որ կենդանիների ամորձատված արուներն ավելի երկար են ապրում:

Իսկ մարդկանց վերաբերյալ վիճակագրությունն այնքան էլ միանշանակ չէր: Այսպես, 1969 թվականին ամերիկյան բժիշկները եկել էին այն եզրակացությանը, որ  ամորձատված հիվանդները 14 տարի երկար են ապրել: Մյուս կողմից, 1993 թվականին իտալացի ամորձատված  երգիչների կենսագրական վերլուծությունը ոչ մի տարբերություն ցույց չէր տվել:

Հարավկորեացի գիտնականների ուսումնասիրությունը հաստատել է տեստաստերոնի հիպոթեզը, հայտնում է «Մոսկովսկի կոմսոմոլեցը»: Նրանք  ուսումնասիրել են  Չոսոն դինաստիայի ներքինիների վերաբերյալ գրառումները: Գիտնականները հետազոտել են  XVI-XIX դդ. ապրած 385 մարդու տվյալներ: 

Ցուցակում  81 ներքինիների են առանձնացրել, որոնց ծննդյան եւ մահվան ճշգրիտ տարեթվերը հայտնի են եղել: Նրանց համեմատել են նույն ժամանակաշրջանում ապրած այլ մարդկանց հետ:  Current Biology ամսագրում հայտնվում է, որ ներքինիները 14-19 տարի ավելի երկար են ապրել: