Գիտնականները մտահոգված են Մերձավոր Արեւելքի երկրներում նախկինում անհայտ վարակից, որը տարածում են չղջիկները եւ որի պատճառով հունիսին վախճանվել էր  Սաուդյան Արաբիայի բնակիչը, այժմ էլ լուրջ հիվանդ է  Քաթարի մի բնակիչ: Այդ վարակը հիմնականում վտանգավոր չէր մարդկանց համար, սակայն նոր տեսակն ինչ-որ պատճառով փոխանցվում է  մարդկանց` առաջացնելով թոքաբորբ եւ երիկամային անբավարարություն:

Տվյալ պահին բժիշկները պետք է արագ  որոշեն այդ վարակի վտանգավորության աստիճանը:

«Չպետք է ժամանակից շուտ խուճապի մատնվել: Երկու հիվանդը դեռեւս չի նշանակում, որ  համաճարակ է սկսվել», - նկատել է Ռոտերդամի Erasmus բժշկական կենտրոնի համաճարակաբան Ռոն Ֆոուչերը: 

Ֆոուչերը նախատեսում է  վարակի փորձարկման համար օգտագործել մակակներին եւ առնետներին, հայտնում է NEWSru Israel-ը:

Վարակի ամենածանր բռնկումը տեղի էր ունեցել 2003 թվականին: Այն ժամանակ վարակվել էին 8 հազար մարդ: Ընդ որում, 900 դեպքեր մահացու ելք էին ունեցել: