Սանկտ Պետերբուրգի սերվիսի եւ տնտեսագիտության  պետական ակադեմիայի ռեկտոր Ալեքսանդր Վիկտորովին սպանողներն ստացել են 1 միլիոն ռուբլի: Ընդ որում, մարդասպանը 600 հազար ռուբլին անմիջապես ծախսել է` մեքենա է գնել: Այդ մասին լրագրողների հետ հանդիպմանը հայտնել  են Պետերբուրգի իրավապահ մարմինների ներկայացուցիչները:

Հանցագործների ձերբակալման համար  համատեղ աշխատանք է տարվել Պետերբուրգի եւ Լենշրջանի քննչական կոմիտեների եւ ԱԴԾ-ի հետ: Տղամարդիկ չեն իմացել, որ իրենց հետեւում են: Սպանության մեղադրանքով ձերբակալվել է Կեմերովոյի բնակիչ, 1974 թվականին ծնված Անդրեյ Ելիսեեւը, իսկ որպես կատարողներ են հանդես գալիս պետերբուրգցի Վյաչեսլավ Մակարովը  (1980 թ.) եւ Լենշրջանի բնակիչ Վիտալի Կովալյովը (1974 թ.):

Հայտնի է նաեւ, որ սպանության նախապատրաստումն սկսվել է օգոստոսի 22-ին: Սեպտեմբերի 30-ին Պետերբուրգում բռնել են ռեկտոր Ալեքսանդր Վիկտորովի սպանության կասկածյալին: Ենթադրյալ մարդասպանի հետ ձերբակալել են նաեւ  պատվիրատուին եւ մարդասպանի օգնականին: Ձերբակալված բոլոր քաղաքացիները նախկինում քրեական պատասխանատվության են ենթարկվել տարբեր հանցագործությունների համար: Իսկ ենթադրյալ մարդասպանին դատել էին պատվիրված սպանության համար:  

Ինչպես նշում է  «Ռոսբալտը», ուժային կառույցների ներկայացուցիչները հրաժարվել են  նշել սպանության պատճառները, սակայն, ամենայն հավանականությամբ, նրանց հայտնի է սպանության դրդապատճառները: Վիկտորովի այրին գտնվում է ոստիկանության պաշտպանության ներքո: 

Ինչպես ավելի վաղ հայտնել էր NEWS.am-ը, Վսեվոլոժկոյում  քաղաքից դուրս իր տան մոտ հրաձգության էր ենթարկվել Սանկտ Պետերբուրգի սերվիսի եւ տնտեսագիտության համալսարանի ռեկտոր Ալեքսանդր Վիկտորովը: Վիրավորվել էր նաեւ նրա կինը: Մարդապանին բռնել չէր հաջողվել: Ոստիկաններն այդ  հանցագործությունը կապել էին տուժածի մասնագիտական գործունեության հետ: