Ղարաբաղյան կողմը պատրաստ է «Ստեփանակերտ» օդանավակայանի շահագործմանը խոչընդոտելու Ադրբեջանի փորձերին: Այդ մասին NEWS.am-ի թղթակցին  հայտնել է ԼՂՀ-ի կառավարությանը կից Քաղաքացիական ավիացիայի  գլխավոր վարչության ղեկավար Դմիտրի Ադբաշյանը` մեկնաբանելով ադրբեջանական մամուլի հրապարակումներն այն մասին, որ  «Ադրբեջանը կարող է շարքից հանել օդանավակայանի տեխնիկական աջակցությունը»:

«Դա հնարավոր է: Եւ բոլորին հայտնի են նման հնարավորությունները: Սակայն մենք հաշվի ենք առել  նման հավանականությունը եւ պատրաստ ենք դրան», - ընդգծել է Դմիտրի Ադբաշյանը:

ՔԱԳՎ-ի ղեկավարը ուշադրություն է հրավիրել այն փաստին, որ նման գործողությունները դասվում են   քաղաքացիական ավիացիայի գործունեությանը ապօրինի ակտիվ  միջամտելու  կատեգորիային: «Ադրբեջանում դա հիանալի գիտակցում են` լինելով  ICAO-ի անդամ եւ Կոնվենցիա ստորագրելով», - հիշեցրել է Ադբաշյանը:

Պատասխանելով ադրբեջանական կողմից  Ստեփանակերտ թռչող ինքնաթիռները խփելու հավանականության եւ դրանց կանխարգելման միջոցների ձեռնարկման վերաբերյալ հարցին` ՔԱԳՎ-ի ղեկավարը նկատել է, որ խոսքը քաղաքացիական օդանավերի մասին է: «Քաղաքացիական օդանավերը չեն պատրաստվում թաքնվել, նրանց վրա կլինեն ճանաչման բոլոր միջոցները»: Ինչ վերաբերում է  չվերթներն սկսելու հստակ ամսաթվին, ապա այն հայտնի կդառնա կազմակերպչական որոշ հարցեր լուծելուց հետո: