նախընտրելի դարձնել
Հայաստանի հատուկ քննչական ծառայությունում ավարտվել է հարկադիր կատարողների կողմից պաշտոնեական լիազորությունները չարաշահելու եւ պաշտոնեական անփութություն դրսեւորելու դեպքի առթիվ հարուցված քրեական գործի նախաքննությունը: Այս մասին NEWS.am-ին հայտնեցին Հատուկ քննչական ծառայությունից:
Նախաքննությամբ պարզվել է, որ Ա.Շախկուլյանը, աշխատելով ՀՀ արդարադատութան նախարարության ԴԱՀԿ ծառայության Լոռու մարզային բաժնի հարկադիր կատարող, անձնական շահագրգռվածությունից ելնելով, պաշտոնեական դիրքն օգտագործել է ծառայության շահերին հակառակ: Մասնավորապես՝ Լոռու մարզի ընդհանուր իրավասության դատարանի 2010թ.օգոստոսի 11-ի ԼԴ/0212/02/10 կատարողական թերթի հիման վրա քաղաքացի Վ. Հովհաննիսյանից 249 766 դրամ հօգուտ բանկի բռնագանձելու նպատակով վերջինիս շարժական գույքի, այդ թվում` կահույքի,ավտոմեքենայի եւ այլ գույքերի առկայության պայմաններում բռնագանձումը տարածել է սեփականության իրավունքով պատկանող՝ Վանաձոր քաղաքում գտնվող բնակարանի վրա: Ընդ որում՝ 7 289 000 դրամ գնահատվելու պարագայում բնակարանը 2012թ. սեպտեմբերի 1-ին հարկադիր էլեկտրոնային աճուրդով իրացրել է ընդամենը 3 278 061 դրամով, որով էական վնաս է պատճառվել անձի օրինական շահերին՝ քաղաքացուն զրկելով բնակարանից՝ այդպիսով առաջացնելով ծանր հետեւանքներ:
Նախաքննությամբ պարզվել է նաեւ, որ ՀՀ արդարադատության նախարարության ԴԱՀԿ ծառայության Լոռու մարզայի բաժնի պետ Ա.Հարությունյանը դրսեւորել է անփույթ վերաբերմունք իր պաշտոնեական պարտականությունների կատարմանը եւ պատշաճ հսկողություն չի սահմանել բաժնում հարուցված վերոհիշյալ կատարողական վարույթի գործողությունների նկատմամբ:
Ձեռք բերված ապացույցների հիման վրա Ա.Շախկուլյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով (պաշտոնական լիազորությունները չարաշահել, որն անզգուշությամբ առաջացրել է ծանր հետեւանքներ), իսկ Ա.Հարությունյանին՝ ՀՀ քրեական օրենսգրքի 315-րդ հոդվածի 2-րդ մասով (պաշտոնեական անփութություն, որն անզգուշությամբ առաջացրել է մարդու մահ կամ այլ ծանր հետեւանքներ):
Քրեական գործն ուղարկվել է Լոռու մարզի ընդհանուր իրավասության դատարան:
