նախընտրելի դարձնել
Գլդանի թիվ 8 բանտի նախկին աշխատակից Դավիդ Ակոբիան, որը նկարահանել էր բանտարկյալների նկատմամբ բռնությունները, ազատ է արձակվել:
Հիշեցնենք, որ սեպտեմբերի 19-ին Ակոբիան ձերբակալվել էր հայ-վրացական սահմանին՝ «Սադախլո» մաքսակետում: Այդ նույն օրը դատախազությունը տարածել էր Ակոբիայի ցուցմունքները, որոնցում նա պատմել էր, որ իրեն կարգադրել են նկարահանել Գլդանի բանտի վայրագությունները: Ըստ դատախազության՝ Ակոբիան ցանկացել էր օգտվել Վկաների պաշտպանության հատուկ ծրագրից եւ հետաքննությանն էր տրամադրել կարեւոր տեղեկություններ, հայտնում է «Նովոստի Գռուզիան»:
Նախօրեին` հոկտեմբերի 10-ին, Ակոբիայի փաստաբանները հայտարարել էին, որ մի քանի օր է`չեն կարողանում պարզել վերջինիս գտնվելու վայրը: Հոկտեմբերի 11-ին «Ազատ Վրաստանի» անդամ Ջաբա Ջիշկարիանին լրագրողներին հայտնել էր, որ ներկայումս Ակոբիան գտնվում է Թբիլիսիի իր տանը: Նա հայտնել է, որ ազատվելուց հետո բանտի նախկին աշխատակիցը չի ցանկանում ոչ ոքի հետ շփվել:
Հիշեցնենք, որ սեպտեմբերի 18-ին Վրաստանի ՆԳՆ-ն տեսագրություններ էր տարածել, որոնցում առկա էին Գլդանի բանտում բանտարկյալներին բռնությունների ենթարկելու փաստեր: Այդ նույն օրը վրացական սոցկայքերում եւ «Մաեստրո» եւ «9-րդ ալիք» հեռուստաալիքներում տարածվել էին Գլդանի բանտի կտտանքների տեսարանները: Տեսագրությունները Թբիլիսիում եւ երկրի մի շարք քաղաքներում բողոքի ալիք էին բարձրացրել: Ձերբակալվել էին տասնյակից ավելի պետական պաշտոնյաներ, որոնք ներկայումս նախնական կալանքի տակ են: Հրաժարական էին տվել պատժի իրագործման եւ իրավաբանական աջակցության նախարար Կաթունա Կալմախելիձեն եւ ՆԳՆ-ի ղեկավար Բաչո Ախալայան:
