Նախընտրելի2014 թվականի աշնանը տեղի կունենա հանրաքվե, որի ընթացքում կպարզվի՝ ցանկանում են արդյոք Շոտլանդիայի բնակիչները անկախանալ Մեծ Բրիտանիայից, թե՞ նախընտրում են նախկինի պես մնալ Միացյալ թագավորության կազմում: Այդ մասին հայտնել է Մեծ Բրիտանիայի կառավարության նախարար Դեւիդ Մանդելը, գրում է «pravda.ru»-ն:
Մեծ Բրիտանիայի կազմում Շոտլանդիան գտնվում է 1707 թվականից, 1997-ից Շոտլանդիան Մեծ Բրիտանիայի կազմում ստացել էր սահմանափակ ինքնավարություն, իսկ երկու տարի անց՝ գործադիր սեփական իշխանություն, նաեւ՝ խորհրդարան: Շոտլանդական հարցի բարձրացման պատճառ էր դարձել 2011 թվականի մայիսին Շոտլանդիայի խորհրդարանական ընտրություններում շոտլանդացի ազգայնականների հաղթանակը` 129 տեղերից կուսակցությունն ստացել էր 69-ը: Կուսակցության առաջնորդ Ալեքսանդր Սելմոնդը կողմ էր արտահայտվել Միացյալ թագավորությունից Շոտլանդիայի անջատվելու հանրաքվեին:
2012 թվականի մայիսի վերջին Շոտլանդիայի կառավարությունը քարոզչություն էր կազմակերպել՝ «Այո Շոտլանդիային» անվանմամբ:
Ըստ Reuters-ի` Շոտլանդիայի անկախանալուն աջակցում են բնակիչների 40%-ը, շոտլանդացիների կեսը դեմ են Միացյալ թագավորությունից անջատվելուն, իսկ 10%-ը դեռեւս չեն կողմնորոշվել:
