ՆԱՏՕ-ն Ռուսաստանին,  Իրանին եւ Չինաստանին ներառել է իր գլխավոր կիբերհակառակորդների ցուցակի մեջ: Նոյեմբերի 13-16-ին  ՆԱՏՕ-ի երկրները կիրականացնեն Cyber Coalition 2012 ռազմական ուսումնավարժանքները, որոնց շրջանակում  ալյանսի երկրների վրա հնարավոր կիբերհարձակումների եւ պատասխան հարվածի սցենարներ կմշակվեն: Այս մասին գրում է «Կոմերսանտը»` վկայակոչելով ՆԱՏՕ-ի իր աղբյուրները:

Այդ սցենարի համաձայն, հարձակման են ենթարկվում երկու երկիր` Հունգարիան եւ Էստոնիան: Հաքերների գործողությունները հանգեցնում են նրան, որ Էստոնիայի կենսունակությունը ամբողջովին կաթվածահար է լինում: Բացի այդ, նրանց հաջողվում է շարքից հանել  ՆԱՏՕ-ի ռազմա-տրանսպորտային ինքնաթիռի  համակարգը, ինչի արդյունքում  այն կործանվում է:  Այս ամենից հետո ՆԱՏՕ-ն խորհրդացության ժամանակ որոշում է  պատասխան հարված հասցնել, այդ թվում ռազմական միջոցներով:

Ռուսաստանն իր հերթին նույնպես սկսել է պատրաստվել հնարավոր կիբերպատերազմի. վերջերս ՌԴ-ի պաշտպանության նախարարությունը հակավիրուսային համակարգերը շրջանցող միջոցների մշակման, ցանցային պաշտպանության եւ օպերացիոն համակարգերի պաշտպանության  տենդեր է հայտարարել:

Նմանատիպ մշակումներ իրականացվում են նաեւ ԱՄՆ-ում: Ամեն տարի այս երկիրը կիբերանվտանգության ոլորտում մշակումների վրա տասնյակ միլիոնավոր դոլարներ է ծախսում, իսկ ընդհանուր առմամբ ՆԱՏՕ-ի անդամ-երկրների ծախսը  մոտակա տարիների համար կարող են հասնել մինչեւ մի քանի միլիարդ դոլարի: