Հայաստանի կառավարությունը մինչեւ նոյեմբերի 7-ը երկրի առաջին նախագահ, ՀԱԿ-ի առաջնորդ Լեւոն Տեր-Պետրոսյանի` Մարդու իրավունքների եվրոպական դատարան ներկայացրած  հայցի վերաբերյալ իր  առարկությունները կներկայացնի: Այդ մասին NEWS.am-ի թղթակցի հետ զրույցում հայտնեց ՄԻԵԴ-ի ներկայացուցիչ, Հայաստանի զինվորական դատախազ Գեւորգ Կոստանյանը:

Նշենք, որ վերջին ժամանակներս մամուլում շրջանառվում է Հայաստանի առաջին նախագահ Լեւոն Տեր-Պետրոսյանի` Երեւանում 2008թ. մարտի 1-ի ողբերգական դեպքերի վերաբերյալ Եվրոդատարան հայց ներկայացնելու թեման:

Հնչել են բազմաթիվ մեկնաբանություներ, նաեւ` հայց ներկայացնելը վստահաբար հերքող:  «Հայկական ժամանակ» օրաթերթի պնդմամբ` Հայաստանը ՄԻԵԴ-ին պատասխան չունի եւ փաստացի ձգձգում է:

Ընթացիկ տարվա մայիսի 15-ին Մարդու իրավունքների եվրոպական դատարանը Լեւոն Տեր-Պետրոսյանի հայցի վերաբերյալ վճիռ էր կայացրել` այն մասնակի անհիմն ճանաչելով: Մասնավորապես, առաջին նախագահը պնդում է, որ տեղի է ունեցել մի շարք իրավունքների խախտում`խոսքի ազատություն  (երաշխավորված Մարդու իրավունքների եւ հիմնարար ազատությունների կոնվենցիայի 10-րդ հոդվածով), միավորման իրավունք (11-րդ հոդված),մատնանշվում է տնային կալանքի տակ գտնվելու փաստը, խտրականությունը, Առաջին արձանագրության 3-րդ հոդվածով ամրագրված ազատ, արդար ընտրություններին մասնակցելու իրավունքը, ինչպես նաեւ վիճարկվում է այն ժամանակվա նախագահ Ռոբերտ Քոչարյանի`  արտակարգ դրություն մտցնելու մասին հրահանգի օրինականությունը:

Ըստ Գեւորգ Կոստանյանի՝ Եվրոպական դատարանը սահմանել է, որ  բոլոր թվարկված իրավունքները, բացի  մեկից, չեն խախտվել, եւ Լեւոն Տեր-Պետրոսյանի պնդումներն անհիմն են: Միայն երկու` տնային կալանքի  եւ միավորման  իրավունքի խախտման հարցերի առնչությամբ,  դատարանը որոշում չի կայացրել եւ անհրաժեշտ է համարել լրացուցիչ խորհրդակցել  Հայաստանի կառավարության հետ, նշել է Կոստանյանը:  «Ես ցանկանում են ընդգծել այն հանգամանքը, որ տնային կալանքի տակ գտնվելու պնդումը դատարանը միանշանակ չի ընդունել, հակառակ դեպքում այն կճանաչեր ընդունելի կամ անընդունելի», -  ավելացրել է ՄԻԵԴ-ում Հայաստանի ներկայացուցիչը:

Միաժամանակ, նա ընդգծել է, որ «մարտի 1-ի դեպքերի հետ կապված տնային կալանքի տակ գտնվելու Լեւոն Տեր-Պետրոսյանի պնդումը անհիմն է»: Ըստ նրա՝ հաջորդ փուլում Եվրոպական դատարանը կարող է կայացնել 2 որոշումներից մեկը՝ կամ այդ պնդումները կհամարի անընդունելի, կամ էլ կկայացնի որոշում, որը կհաստատի կամ փաստը, կամ էլ խախտման փաստի բացակայությունը:

«Ինձ համար՝ որպես Հայաստանի կառավարության ներկայացուցչի, նշանակություն չունի, թե ինչ գործի մասին է խոսքը:  Ես տեղին չեմ համարում  հաղթանակի կամ պարտության մասին խոսելը, քանի որ Եվրոպական դատարանի ցանկացած որոշում, անկախ նրանից, թե հաստատվել է արդյոք  խախտման առկայությունը, թե ոչ,  նպատակ ունի մեզ ավելի լավը դարձնելու, մոտեցնելու եվրոպական չափանիշներին: Սա դաս է,  հիմք՝ որոշակի գործողությունների համար », - ընդգծել է Գեւորգ Կոստանյանը:

Հիշեցնենք, որ 2008 թվականի հետընտրական գործընթացներն ավարտվել էին Երեւանի կենտրոնում բախումներով, որոնց ընթացքում զոհվել էր 8 ցուցարար եւ Ներքին զորքերի 2 զինվորական: Մարդկանց մահվան համար դեռ ոչ ոք չի պատժվել: