Լիբանանի մայրաքաղաքում նախօրեին տեղի ունեցած  միջադեպից հետո համեմատական հանգստություն է տիրում: Ինչպես NEWS.am-ի թղթակցին հայտնել է տեղական «Ազդակ» թերթի գլխավոր խմբագիր Շահան Քանդահարյանը, հոկտեմբերի 22-ի առավոտյան քաղաքում համեմատական հանգիստ իրավիճակ է տիրում: Միայն հարավային շրջաններում պարբերաբար ճանապարհներ են փակվում:

Շահան Քանդահարյանի խոսքով, կառավորության շենքի տարածքը իրավապահ մարմինների կողմից խիստ հսկողության տակ է գտնվում: «Մարդիկ աշխատանքի են դուրս եկել, քաղաքում կյանքը աստիճանաբար կարգավորվում է»,-հաղորդել է Շահան Կանդահարյանը, միաժամանակ ավելացնելով, որ ընդհանուր լարվածությունը պահպանվում է: Նրա խոսքով, ակնհայտ է, որ օրվա ընթացքում  կհնչեն  քաղաքական հայտարարություններ, քանի որ ընդդիմությունը շարունակում է պահանջել կառավարության հրաժարականը:

Ինչպես ավելի վաղ հայտնել էր  NEWS.am-ը, հոկտեմբերի 21-ին ցուցարարների խումբը  փորձել էր  գրոհել Բեյրութում Լիբանանի կառավարության շենքը:  Նրանք կարողացել են  հաղթահարել  ոստիկանների  պատնեշը: Նրանք պահանջել են  վարչապետի հրաժարականը` անվտանգության ուժերի բարձրաստիճան պաշտոնյա  Վիսամ ալ Հասանի մահվան համար, որը զոհվել էր հոկտեմբերի 19-ի ահաբեկչության հետեւանքով:  Ամբոխը Բեյրութում Վիսալ ալ-Հասանի հուղարկավորման արարողությունից հետո ուղեւորվել էր դեպի կառավարության շենք:

Կառավարական անվտանգության ուժերը ցուցարարներին կանգնեցնելու համար ստիպված են եղել կրակ բացել եւ արցունքաբեր գազ կիրառել: Որոշ լրատվամիջոցներ հայտնել են, որ Բեյրութում գիշերը կրակոցներ են հնչել: