նախընտրելի դարձնելԱդրբեջանի ԱԳՆ-ն դեռեւս գաղտնի է պահում Հայաստանի եւ Ադրբեջանի ԱԳՆ-ների ղեկավարներ Էդվարդ Նալբանդյանի եւ Էլմար Մամեդյարովի կայանալիք հանդիպման տվյալները: Ինչպես արբանյակային միջազգային «ATV-int» հեռուստաալիքին տեղեկացրել է Ադրբեջանի ԱԳՆ մամուլի ծառայության ղեկավար Էլման Աբդուլայեւը, գերատեսչությունների ղեկավարների տեղաշարժերի վերաբերյալ տեղեկությունները գաղտնի են պահվում ««ԱՍԱԼԱ» ահաբեկչական կազմակերպության» սպառնալիքների պատճառով:
Ադրբեջանի ԱԳՆ ղեկավարի տեղաժարժերը գաղտնի պահելը նորություն չէ, նախավերջին անգամ այդ մասին Բաքվում խոսել են մեկ շաբաթ առաջ: Սակայն ԵԱՀԿ Մինսկի խմբի համանախագահների եւ Հայաստանի ԱԳՆ ղեկավարի հանդիպման գաղտնիության մասին պնդելն անհարգալից վերաբերմունք է հեռուստադիտողների եւ ընթերցողների նկատմամբ:
Կայանալիք հանդիպման մասին խոսվել է բազմիցս: Հանդիպումների մասին, որպես կանոն, հայտնում են մի քանի երկրների լրատվամիջոցները: Այդ ենթատեքստում հանդիպման գաղտնիության մասին խոսելն ավելորդ է: Այդպիսով, Աբդուլայեւի հայտարարությունը եւ վախից կլորացած աչքերը ոչ այլ ինչ են, եթե ոչ թատերական ներկայացում, ցանկացած առիթ օգտագործելու փորձ, տվյալ դեպքում «ԱՍԱԼԱ»-ն` որպես հակահայկական քարոզչության միջոց:
