Վրաստանի նախկին նախագահ Էդուարդ Շեւարդնաձեի փեսան,  «Մագտիկոմ» բջջային կապի վրացական ընկերության  հիմնադիրներից մեկը` Գիա Ջոխտաբերիձեն վստահեցնում է, որ 66 օր բանտարկված է մնացել ոչ թե հարկերից խուսափելու համար, այլ  նախագահ Միխայիլ Սահակաշվիլիի անձնական հրամանով:

Ավելի վաղ «Մաեստրո» հեռուստաընկերության եթերով  «Ազատ համալսարանի» հիմնադիր Կախա Բենդուկիձեն հայտնել է, որ Ջոխտաբերիձեն  ձերբակալվել է հարկերից խուսափելու համար: Շեւարդնաձեի փեսան նամակ է հղել հեռուստաընկերություն, որում ասվում է, որ Բենդուկիձեի հայտարարությունը կեղծ է:

«Ոչ մի հարկ ես չեմ թաքցրել: 66 օր ես ձերբակալված եմ մնացել Միխայիլ Սահակաշվիլիի  հրամանով: Ա, դուրս չի գա բանտից: Նրանք  ուսումնասիրել են  «Մագտիկոմի» ֆինանսական դրությունը, եւ երբ խախտումներ չեն հայտնաբերել,  դատախազությունը  հանել է մեղադրանքները, սակայն բանտում գպետությունն իր ձեռքն է առել «Մագտիկոմի» 20 տոկոսը, որը հետագայում ես ու իմ  գործընկերները վերադարձրել ենք 15  միլիոն դոլարով: Արդյունքում մենք անօրինական կերպով վճարել ենք 30 միլիոն դոլար»,-նամակում գրել է Ջոխտաբերիձեն:

«Գրուզիա Օնլայն» գործակալությունը նշում է, որ Վրաստանի նախկին նախագահ Էդուարդ Շեւարդնաձեի փեսան  «Վարդերի հեղափոխությունից» անմիջապես հետո հայտնվել է նոր կառավարության ռեպրեսիայի առաջին ալիքի  մեջ: