Լիբանանի ընդդիմությունը սիրիական սցենարի կրկնություն թույլ չի տա: Այդ մասին NEWS.am-ի թղթակցի հետ զրույցում հայտնել է արաբագետ Երվանդ Մինասյանը՝ մեկնաբանելով Լիբանանի իրադրությունը: 

Ըստ Մինասյանի՝ Լիբանանում համեմատաբար ավելի ժողովրդավարական կարգեր են, այստեղ միակուսակցական համակարգի մասին խոսք չկա: «Կուսակցությունների միջեւ ձեւավորվել են  քաղաքական  ավանդույթներ, որոնք թույլ չեն տա քաղաքացիական պատերազմ: Այն թույլ չեն տա նաեւ երկրում ապրող քրիստոնյաները, քանի որ քաջ գիտակցում են հետեւանքները»:

Նա նաեւ նշել է, որ երկրի ընդդիմությունը եւ կառավարությունը մասնավորապես համաձայնության են եկել վարչապետի հրաժարականի հարցում, որը պաշտոնը լքելու պատրաստակամություն է հայտնել: Կառավարությունը քայլեր է ձեռնարկել  իրադրությունը վերահսկելու նպատակով: Իր հերթին էլ ընդդիմությունն իր կողմնակիցներին է կոչ արել չդիմել ծայրահեղ քայլերի: 

Ըստ արաբագետի՝ նույնիսկ վարչապետի եւ կառավարության  փոփոխությունը չի լուծի Լիբանանի ներքին բոլոր խնդիրները:  Արաբագետը նաեւ չի բացառել, որ Լիբանանում իրադրության անկայունացման թիկունքում կանգնած է Իսրայելը, որը կարող էր կազմակերպած լինել հոկտեմբերի 19-ի ահաբեկչությունը: