Հարավկորեական մամուլը վստահեցնում է, որ  Հյուսիսային Կորեայի իշխանությունները  մահապատժի են ենթարկել  ազգային զինված ուժերի  փոխնախարար Կիմ Չխոլյային: Պաշտոնյային պատժել են այն բանի համար, որ անցյալ տարի երկրի` վախճանված  առաջնորդ Կիմ Չեն Իրուի մահվան պաշտոնական  սգո արարողության ժամանակ սգալու փոխարեն նա  «կերուխում» է արել: Նրանց տվյալներով, փոխնախարարը կալանքի տակ է վերցվել այս տարվա սկզբին`  մահացած առաջնորդի ժառանգորդի եւ  գլխավոր հրանատարի` Կիմ Չեն Ընի հրամանով:

Հարավկորեական մամուլի վարկածով փոխնախարարին գնդակահարել են ականանետից, գրում է բրիտանական  The Telegraph թերթը: Պատժամիջոցի նման էկզոտիկ տարբերակը ընտրվել է  կորեացի ժողովրդի նոր «հզոր առաջնորդի»  կարգադրությամբ`  որպեսզի  դավաճանից անգամ թաց տեղ չմնա:

Հետախուզության տվյալներով, Հյուսիսային Կորեայում ռեպրեսիաներին զոհ են գնացել 14 բարձրաստիճան անձինք: Շատերը հեռացվել են իրենց պաշտոններից` չարժանանալով երիտասարդ առաջնորդի բարեհաճությանը, հաղորդում է NEWSru.com-ը:

Վերլուծաբանների կարծիքով, որպեսզի արմատից ոչնչացվի ցանկացած քննադատություն եւ խռովության փորձ` Կիմ չեն Ընը որոշել է գործել կանխարգելման տարբերակով` ազատվելով ոչ հաճելի ղեկավարներից: Հոր մահից հետո, երբ նա զբաղեցրել է հյուսիսկորեական առաջնորդի պաշտոնը, սկսել են անհետանալ բարձրաստիճան սպաներ, պատմել է հարավկորեական Chosun Ilbo թերթի աղբյուրը: Որոշ վկայություններով ձերբակալվել, կամ մահապատժի են ենթարկվել տասնյակ սպաներ: