նախընտրելի դարձնելՎրաստանի խորհրդարանը հենց նոր ձայների մեծամասնությամբ կողմ է քվեարկել Բիձինա Իվանիշվիլիի քաղաքական առաջնորդությամբ «Վրացական երազանք» կոալիցիայից կազմված նոր կառավարությանը: «Կողմ» է քվեարկել 88, դեմ՝ 54 պատգամավոր:
Ավելի վաղ` հոկտեմբերի 25-ին, «Վրացական երազանքի» առաջնորդը եւ Վրաստանի վարչապետի թեկնածու Բիձինա Իվանիշվիլին խորհրդարանում ներկայացրել է Կառավարության՝ «Հանուն ուժեղ, ժողովրդավար, միասնական Վրաստանի» անունը կրող ծրագիրը: Որպես արտաքին քաղաքական գերակայություն` Իվանիշվիլին առանձնացրել է ԵՄ-ի հետ ինտեգրման եւ եվրաատլանտյան կողմնորոշումը:
«Տարածաշրջանային կշռադատված քաղաքականությամբ Վրաստանը պետք է ձեռք բերի կովկասյան շահերը միավորող գործառույթ: Կարեւոր են Հայաստանի, Ադրբեջանի եւ Թուրքիայի հետ քաղաքական եւ տնտեսական հարաբերությունները»,-ասել է նա: Հարավային Օսիայի եւ Աբխազիայի հետ հակամարտության կարգավորման հարցում Իվանիշվիլին կոչ է արել օգտագործել ազգային դիվանագիտությունը եւ նպաստել տնտեսական վերականգնմանն ու բիզնես ծրագրերին:
Ներքին քաղաքականության հարցում Իվանիշվիլին խոստացել է լայնածավալ բարեփոխումներ իրականացնել ռամավարական բոլոր ուղղություններով, ինչպես նաեւ բնակչությանը չբաժանել յուրայինների եւ օտարներին: Նա ընդգծել է , որ խախտումների բոլոր մեղավորները պատասխան կտան դատարանի առաջ, սակայն քաղաքական հետապնդումներ չեն լինի:
Իվանիշվիլին նաեւ նշել է, որ նոր կառավարությունը տարբեր միջոցներ է առաջարկում ազգային փոքրամասնությունների վրացական հասարակությանն ինտեգրման ու ներգրավման համար: Նշված միջոցների թվում է փոքրամասնությունների մշակույթի մասսայականացումը եւ պաշտպանությունը, լեզվի ու ավանդույթների զարգացումը:
Ինչպես հայտնում է «Նովոստի Գրուզիան», Իվանիշվիլիի հակառակորդները` «Միասնական ազգային շարժման» ներկայացուցիչները քննադատել են կառավարության նոր ծրագիրը: «Ոչ մի դրական ծրագիր գոյություն չունի, իսկ մենք դա լավ ենք տեսնում»,-ներկայացրել է փոքրամասնության ներկայացուցիչ Գեորգի Գաբաշվիլին:
