նախընտրելի դարձնելՖիլիպիններում դատում են երկրի նախկին նախագահ Գլորիա Արոյոյին`ազգային վիճակախաղի 8 միլիոն դոլար կազմող ֆոնդերի շորթման գործով: Գործընթացի սկզբում պետության նախկին ղեկավարը հրաժարվել է ընդունել իր մեղքը: Գլորիա Արոյոն Ֆիլիպինները ղեկավարել է 2001-2010 թթ., նրան սպառնում է ցմահ բանտարկություն:
Ողնաշարային հիվանդությամբ տառապող Արոյոն անդամալույծի սայլակով դատարան է ժամանել զինհոսպիտալից, որտեղ կալանքի տակ էր պահվում, հայտնում է BBC-ի ռուսական ծառայությունը:
Սա նախկին նախագահի դեմ հարուցված արդեն երրորդ գործն է կաշառակերության մեղադրանքով: Նա մեղադրվում է նաեւ 2007 թվականի ընտրությունների կեղծման մեջ:
Ֆիլիպինների գործող նախագահ Բենիգնո Ակինոն պնդում է, որ իր նախորդի նկատմամբ դատը կառավարական ծրագրի կարեւորագույն կետերից է` ուղղված կաշառակերության դեմ պայքարին: Արոյոն էլ իր հաջորդին մեղադրում է քաղաքական վրեժխնդրության մեջ:
Առաջին անգամ Արոյոն ձերբակալվել էր 2011 թվականի նոյեմբերին, երբ փորձել էր լքել երկիրը` արտասահմանում բուժվելու նպատակով:
