նախընտրելի դարձնել
Լեռնային Ղարաբաղի նախագահ Բակո Սահակյանը շնորհակալություն է հայտնել Ավստրալիայի Հայ դատի հանձնախմբին եւ Նոր Հարավային Ուելս նահանգին:
Հանձնախմբի գործադիր տնօրեն Վաչե Ղահրամանյանի հետ հեռախոսազրույցի ընթացքում ԼՂՀ նախագահը շնորհակալություն է հայտնել Նոր Հարավային Ուելս նահանգի կողմից ԼՂՀ-ի եւ նրա ժողովրդի ինքնորոշման իրավունքի ճանաչման գործում աջակցության համար:
«Մենք շնորհակալություն ենք հայտնում Հայ դատի հանձնախմբին եւ բոլոր նրանց, ովքեր մասնակցել են Լեռնային Ղարաբաղի Հանրապետության ճանաչմանը: Մենք համոզված ենք, որ Լեռնային Ղարաբաղի Հանրապետությանն աջակցելուն ուղղված ջանքերը կշարունակվեն նաեւ ապագայում»,- հայտարարել է Սահակյանը:
Իր հերթին Ղահրամանյանը նախագահ Սահակյանին վստահեցրել է, որ Հանձնախումբը եւ ամբողջ աշխարհում կազմակերպության ցանցը կշարունակեն Լեռնային Ղարաբաղի միջազգային ճանաչմանն ուղղված ջանքերը:
Ավելի վաղ NEWS.am-ը հայտնել էր, որ ավստրալական Նոր Հարավային Ուելս նահանգի Օրենսդիր խորհուրդը հոկտեմբերի 25-ին Լեռնային Ղարաբաղի անկախության եւ նրա ժողովրդի ինքնորոշման իրավունքի ճանաչման բանաձեւ էր ընդունել: Բանաձեւն ընդունելով` Օրենսդիր խորհուրդը «Ավստրալիայի կառավարությանը կոչ է արել պաշտոնապես ճանաչել Լեռնային Ղարաբաղի Հանրապետության անկախությունը եւ խորացնել հարաբերությունները Լեռնային Ղարաբաղի եւ նրա քաղաքացիների հետ»:
