նախընտրելի դարձնելՖրանսիայի իշխանությունները կալանքից ազատել են Ժան Կլոդ Մասին` ֆրանսիական Poly Implant Prothese (PIP) կրծքի անորակ իմպլանտներ արտադրող ընկերության նախկին ղեկավարին:
Ժան Կլոդ Մասը ձերբակալվել եւ կալանքի տակ էր վերցվել Սի Ֆուր Լե Պլյաժ քաղաքի իր ծանոթուհու տանը` հունվարին: Նույն երեկոյան դատավորը վճիռ էր կայացրել գրավի դիմաց նրան ազատ արձակելու վերաբերյալ: Նա կրկնակի ձերբակալվել էր մարտին` գրավը չվճարելու համար, իսկ հոկտեմբերի 29-ին լրացել էր նախնական կալանքի առավելագույն ժամկետը:
Ֆրանսիայի քննչական մարմինները շարունակում են քննել ներկայումս չգործող PIP ընկերության ղեկավարի գործը: Ավելի վաղ Մասին արգելվել էր լքել երկիրը եւ հանդիպել իր ընկերության նախկին ղեկավարների եւ թոփ մենեջերների հետ, հաղորդում է «ՌԻԱ Նովոստին»:
Ֆրանսիայի իշխանություններն PIP-ի արտադրանքը արգելել էին կիրառել դեռեւս 2010 թվականին, երբ պարզվել էր, որ իմպլանտները պատրաստված են եղել արդյունաբերական գելից, իսկ նրանց արտաքն թաղանթը պատռվում է շատ հաճախ: Այս տարվա նոյեմբերին PIP-ի հաճախորդուհիներից մեկի մահվանից եւ հիվանդացության 8 դեպքերից հետո բժիշկները հետազոտություն են անցկացրել, որի արդյունքներից ելնելով` երկրի առողջապահության նախարարությունը 30 հազար ֆրանսուհիների խորհուրդ է տվել պետության հաշվին հանել PIP-ի իմպլանտները:
PIP ընկերությունը գրավել էր համաշխարհային շուկայի 84%-ը: Ըստ լրատվամիջոցների` կրծքի անորակ իմպլանտները վաճառվել էին 65 երկրներում: Ամբողջ աշխարհում այդ ոչ այնքան թանկ ապրանքները կրում է 400-500 հազար կին:
