նախընտրելի դարձնելՄոսկվայում իտալական Il Pittore ռեստորանի տնօրեն Սուրեն Մկրտչյանը 1 տարի 8 ամսվա ազատազրկման է դատապարտվել 2012 թ-ի հունվարին ռեստորանում գազի բալոնի պայթյունի պատճառով: Մկրտչյանն ամբողջովին ընդունել է իր մեղքը, եւ դատաքննությունն արագացված կարգով է ընթացել:
Ինչպես հայտնում է «Մոսկովսկի կոմսոմոլեցը», Սուրեն Մկրտչյանի նկատմամբ մեղադրանք է ներկայացվել աշխատանքի հսկողության կանոնները խախտելու եւ անզգուշության հետեւանքով մարդու մահվան պատճառ դառնալու, ինչպես նաեւ կյանքի անվտանգության կամ սպառողի առողջության համար անհամապատասխան ծառայություններ մատուցելու հոդվածներով:
Միջադեպից անմիջապես հետո Մկրտչյանը անձամբ փոխհատուցել է բոլոր տուժածներին եւ զոհվածների ընտանիքներին: Տուժածներից ոչ մեկը, նշում է պարբերականը, ռեստորանի նկատմամբ պահանջներ չի ներկայացրել, իսկ զոհվածների հարազատները դատարանին խնդրել են դադարեցնել Մկրտչյանի նկատմամբ քրեական հետապնդումը, քանի որ նա արդեն փոխհատուցում է վճարել:
Il Pittore ռեստորանում գազի բալոնի պայթյունը տեղի է ունեցել հունվարի 9-ին: Պայթյունի, իսկ հետո ծագած հրդեհի արդյունքում զոհվել են ռեստորանի երեք աշխատակիցներ, եւս 31 մարդ ստացել է տարբեր աստիճանի մարմնական վնասվածքներ: Տուժածների թվում եղել են ԱՊՀ երկրների քաղաքացիներ, Բելգիայի քաղաքացիներ եւ ռուսներ: Տուժածների թվում եղել են նաեւ ծագումով հայ Ռուսաստանի քաղաքացիներ:
