Քննչական կոմիտեն մտադիր է «Էկովախտա» կազմակերպության  ակտիվիստ Սուրեն Ղազարյանին մեղադրանք ներկայացնել Գելենջիկում  «պուտինի պալատի» երեք թիկնապահներին սպանելու սպառնալիքի համար:  Այդ մասին իր բլոգում գրում է լրագրող Օլեգ Կոզիրյովը:

Ըստ նրա` բնապահպանին Գելենջիկում հարցաքննության են կանչել, որտեղ ամենայն հավանականությամբ, նրան կալանք է սպառնում: Ըստ բողոքի` բնագետը քարեր է նետել թինապահների վրա եւ սպառնացել է սպանել նրանց:

Եթե մեղադրանք ներկայացվի, ապա բավական մեծ են Ղազարյանին կալանելու հնարավորությունները: Բնապահպանը վերջերս պայմանական  ժամկետի էր դատապարտվել նահանգապետ Տկաչովի տան ցանկապատի ավերման համար, եւ այդ հանգամանքը կարող է ազդել դատարանի որոշման վրա:

Լրագրողը դիմել է լրատվամիջոցներին, քաղաքական եւ հասարակական կազմակերպություններին` խնդրելով օգնել Ղազարյանին, հայտնում է «Ռոսբալտը»:

Ըստ Ղազարյանի`  Սեւ ծովի մերձակայքում գտնվող օբյեկտը պատկանում է մասնավոր «Ինդոկոպաս» ընկերությանը, իսկ սկզբնապես այն կառուցել էին Ռուսաստանի նախագահի գործերի կառավարման համար:  Մինչդեռ հիշեցնենք, որ ավելի վաղ  նախագահի մամուլի քարտուղար Դմիտրի Պեսկովը հերքել էր Պուտինի եւ սեւծովյան այդ պալատի միջեւ որեւէ կապի առկայությունը: