Ադրբեջանում «Հավաքների ազատության մասին» օրենքում փոփոխություններ կատարելը գործնականում  ընտրական օրենսդրության հերթական խստացումն է` պայմանավորված նախագահական առաջիկա ընտրություններով: Այդ մասին NEWS.am-ի հետ զրույցում հայտնել է ՌԳԱ Արեւելագիտության ինստիտուտի Կենտրոնական Ասիայի և Կովկասի ուսումնասիրման կենտրոնի փորձագետ Անդրեյ Արեշեւը:

Քաղաքագետի խոսքով, հետխորհրդային երկրներում ժողովրդավարական նորմերի, խոսքի եւ գործի ազատության, հավաքների ազատության ընկալումները որոշ նրբերանգներ ունեն`կախված տվյալ երկրի քաղաքական իրավիճակից: «Միանգամայն ակնհայտ է, որ Ադրբեջանում իրադրությունն այնքան էլ  պարզ չէ,  ինչպես այն ժամանակ առ ժամանակ փորձում են ներկայացնել: 2013 թվականին Ադրբեջանում կկայանան նախագահական ընտրություններ, եւ չնայած, որ  իշխանության կուսակցությունը վերահսկում է իրավիճակը, երկրում  որոշ ընդդիմադիր ուժեր կան` ինչպես աշխարհիկ, այնպես էլ կրոնական ուղղվածության: Ըստ ստացված որոշ տվյալների՝ հենց իսլամական ընդդիմադիր խմբերն են բավականին ակտիվ եւ ժողովրդին ցույցերի են առաջնորդում», - նշել է Արեշեւը:

Ինչ վերաբերում է տվյալ խիստ փոփոխությունների նկատմամբ Արեւմուտքի արձագանքին,  ապա ըստ քաղաքագետի,  մակերեսային  արձագանք կհետեւի, սակայն, փաստացի, այն շատ թույլ կլինի: «Եվրոպան, ԵՄ-ն եւ ԱՄՆ-ն շահագրգիռ են Ադրբեջանի ներկայիս իշխանությունների հետ  համագործակցության հարցում` կապված խոշորագույն էներգետիկական նախագծերի հետ: ԱՄՆ-ն եւ Արեւմուտքն այնտեղ «արաբական գարուն» հրահրելու  հրատապ անհրաժեշտություն չեն տեսնում, հետեւաբար, միջազգային կամ եվրոպական իրավապաշտպան կառույցների կողմից քննադատություն կլինի, սակայն` բավականին թույլ»:

Նշենք, որ նոյեմբերի 2-ին Ադրբեջանի խորհրդարանը լիագումար նիստում փոփոխություններ կմտցնի  «Հավաքների ազատության մասին» օրենքում: Նախատեսվում է 2 փոփոխություն կատարել. Օրենքի 5-րդ հոդվածում  կընդգրկվի լրացուցիչ կետ` ակցիայի կազմակերպիչների կողմից անհրաժեշտ տեղեկություններ ներկայացնելու մասին: 6-րդ հոդվածում դրույթ է մտցվում, ըստ որի` ակցիայի կազմակերպիչներ կարող են լինել մեկ կամ մի քանի  ֆիզիկական կամ իրավաբանական անձինք:  Կանոնների խախտման դեպքում  նախատեսվում է կիրառել 5-8 հազար մանաթ տուգանք (6 - 9,5 հազար դոլար) կամ 23 տարվա ուղղիչ աշխատանքներ: Ըստ գործող օրենսդրության՝ տուգանքը կազմում է  ընդամենը 100-150 մանաթ: