«Հավաքների ազատության մասին» օրենքում փոփոխություններ կատարելուց հետո Արեւմուտքն Ադրբեջանին  մարդու իրավունքների ոտնահարման համար  միայն ամոթանք կտա: Այդ մասին NEWS.am-ի թղթակցի հետ զրույցում  հայտնել է Կովկասի ինստիտուտի տնօրենի տեղակալ, քաղաքագետ Սերգեյ Մինասյանը:

Ըստ նրա՝ ելնելով քաղաքական նպատակահարմարությունից եւ արեւմտյան կառույցների` Ադրբեջանի հետ ունեցած փոխհարաբերություններից, առաջիկա մի քանի տարում Արեւմուտքը չի խառնվի  այդ երկրի ներքին գործընթացներին:

Նշենք, որ նոյեմբերի 2-ին Ադրբեջանի խորհրդարանը լիագումար նիստում փոփոխություններ կմտցնի  «Հավաքների ազատության մասին» օրենքում: Նախատեսվում է 2 փոփոխություն կատարել. Օրենքի 5-րդ հոդվածում  կընդգրկվի լրացուցիչ կետ` ակցիայի կազմակերպիչների կողմից անհրաժեշտ տեղեկություններ ներկայացնելու մասին: 6-րդ հոդվածում դրույթ է մտցվում, ըստ որի` ակցիայի կազմակերպիչներ կարող են լինել մեկ կամ մի քանի  ֆիզիկական կամ իրավաբանական անձինք:  Կանոնների խախտման դեպքում  նախատեսվում է կիրառել 5-8 հազար մանաթ տուգանք (6 - 9,5 հազար դոլար) կամ 23 տարվա ուղղիչ աշխատանքներ: Ըստ գործող օրենսդրության՝ տուգանքը կազմում է  ընդամենը 100-150 մանաթ:

Լուսանկարը` Սոնա Բարսեղյանի /NEWS.am