Վրաստանի նախկին վարչապետ Զուրաբ Ժվանիայի  մահվան գործի քննության շրջանակում  Գլխավոր դատախազությունը կհարցաքննի Վրաստանի նախագահ Միխայիլ Սահակաշվիլիին, ՆԳՆ-ի եւ արդարադատության  նախկին նախարար Վանո Մերաբիշվիլիին, իշխանափոխությունից հետո երկրից փախած Զուրաբ Ադեիշվիլիին եւ  խորհրդարանի փոխխոսնակ Գեորգի Բարամիձեին: Այդ մասին  «Մաեստրո» հեռուստատեսության  հետ հարցազրույցում հայտնել է Վրաստանի գլխավոր դատախազ Արչիլ Քբիլաշվիլին:  Նա հայտնել է, որ այդ գործը կհանձնվի հետագա քննության առաջին հեթին:  

Ըստ Արչիլ Քբիլաշվիլիի` հետաքննությունը կհամագործակցի զոհվածի ընտանիքի հետ, հաղորդում է «ՎԶԳԼՅԱԴ»-ը: Հիշեցնենք, որ  գլխավոր դատախազը պաշտոնին անցնելուց անմիջապես հետո խոստացել է հետաքննել Ժվանիայի մահվան հանգամանքները:

Իր հերթին «Ասավալ դասավալի» թերթին տված հարցազրույցում Վրաստանի նախկին նախագահ Էդուրադ Շեւարդնաձեն հայտարարել էր, որ «Ժվանիան սպանվել էր, քանի որ  մեծ հավանականություն կար, որ նա էր փոխարինելու Սահակաշվիլիին նախագահի պաշտոնում»:

Հիշեցնեք, որ  Զուրաբ Ժվանիայի մահվան հանգամանքների մասին նորից խոսել էին Վրաստանում անցած խորհրդարանական ընտրություններից հետո, երբ ընդդիմադիր «Վրացական» երազանք  կոալիցիան հաղթել էր Միխայիլ Սահակաշվիլիի իշխող «Միացյալ ազգային շարժմանը»: Վերջերս Զուրաբի եղբայր Գիորգի Ժվանիան հայտարարել է, որ Վրաստանի նախագահ Միխայիլ Սահակաշվիլին «անձամբ է ղեկավարել իր եղբոր մահվան կազմակերպումը»` 2005 թվականին: 

2005 թվականի փետրվարի 3-ին Զուրաբ Ժվանիան մահացած էր գտնվել Թբիլիսիի բնակարանում: Այդ նույն բնակարանում հայտնաբերվել էր  նրա ընկերոջ` Վրաստանի Քվեմո Քարթլի մարզում նախագահի լիազոր ներկայացուցչի տեղակալ Ռաուլ Յուսուպովի դիակը: Ըստ պաշտոնական վարկածի` Ժվանիան եւ Յուսուպովը մահացել էին  գազի թունավորումից: