Սեփական թեկնածուի առաջադրման կամ այլ թեկնածուի պաշտպանության մասին հայտարարության ձգձգումը «Բարգավաճ Հայաստան» կուսակցության համար ինչպես առավելություններ ունի, այնպես էլ ռիսկային գործոն է պարունակում: Այս մասին NEWS.am-ի թղթակցի հետ զրույցում հայտնել է  «Ժառանգություն» կուսակցության վարչության քարտուղար Ստեփան Սաֆարյանը:

Սաֆարյանի խոսքով,  առավելությունը նրանում  է, որ «Բարգավաճ Հայաստանում» գիտակցում են, որ նրանց  դիրքորոշումը շատ կարեւոր է  քաղաքական ստատուս-քվոյի պահպանման կամ փոփոխման համար եւ չեն շտապում հայտարարել նախագահական ընտրություններում իրենց մասնակցության մասին, քանի որ կուսակցությունից սպասելիքները շատ են:

Սաֆարյանը նաեւ նշել է, որ Հայ ազգային կոնգրեսի հետագա գործողությունները մեծամասամբ կախված են  «Բարգավաճ Հայաստանի» գործողություններից. «ՀԱԿ-ը չի հայտնում այն մասին, որ մերժում է «Բարգավաճ Հայաստանի» հետ համագործակցությունը: ՀԱԿ-ը սպասում է, որ ԲՀԿ-ն ավելի կխստացնի իր քաղաքական դիրքորոշումը: Թեեւ ԲՀԿ-ն չի շտապում  այդ անել, հետեւաբար, ՀԱԿ-ից որեւէ քայլ պետք է ակնկալել միայն այն ժամանակ, երբ ԲՀԿ-ն կանի այդ քայլը»: Ինչ վերաբերում է ռիսկի գործոնին, ապա  Սաֆարյանի կարծիքով,  «Բարգավաճ Հայաստանում» լավ հասկանում են, որ հանրապետականները ուժեղացնում են ճնշումները եւ այդ համատեքստում Վարդան Օսկանյանին  պատգամավորական անձեռնխելիությունից զրկումը` ահազանգ է»:

Պատասխանելով այն հարցին, թե ԲՀԿ-ի բոլոր թեկնածուների՞ն է աջակցելու ՀԱԿ-ը` Սաֆարյանը նշել է, որ  երեք հնարավոր թեկնածուներից` Գագիկ Ծառուկյանից, Ռոբերտ Քոչարյանից եւ Վարդան Օսկանյանից ՀԱԿ-ի համար ամենաանընդունելին Օսկանյանն է: «Այս մասին վկայում է այն հանգամանքը, որ ՀԱԿ-ի ամառային հանրահավաքի ժամանակ  Լեւոն Տեր-Պետրոսյանը ոչ մի խոսք չի ասել «Օսկանյանի գործի վերաբերյալ»: Եթե ՀԱԿ-ը Օսկանյանի դիտարկեր որպես թեկնածու,  ապա արդեն ամառվանից նրան  կառներ իր խնամակալության տակ, սակայն նման բան  տեղի չի ունեցել: Եթե ՀԱԿ-ը հնարավոր համարեր  Լեւոն Տեր-Պետրոսյանի առաջադրումը, ապա կոնգրեսը կցանկանար, որ ԲՀԿ-ն առաջադրեր Ռոբերտ Քոչարյանի թեկնածությունը, քանի որ Լեւոն Տեր-Պետրոսյանը հայտարարել է, որ իր թեկնածությունը կառաջադրի այն դեպքում, եթե նման բան անի Ռոբերտ Քոչարյանը: Սակայն քանի որ  Տեր-Պետրոսյանը չի ցանկանում առաջադրվել, ապա այդ համատեքստում ՀԱԿ-ին ձեռնտու չէ Ռոբերտ Քոչարյանի թեկնածությունը: Թեեւ Սերժ Սարգսյանին  հեռացնելու համատեքստում ՀԱԿ-ի համար Քոչարյանը ցանկալի թեկնածու է»:

Լուսանկարը` Սոնա Բարսեղյանի / NEWS.am