Հայ-թուրքական հարաբերությունների կարգավորման տեղաշարժը  կախված է  տարածաշրջանի քաղաքական  պայմաններից: Այս մասին հայտնել է ՆԱՏՕ-ում  Թուրքիայի ներկայացուցիչ Օնուր Սայլամը` նոյեմբերի 5-ին հանդես գալով Երեւանում` ՆԱՏՕ-ի շրջանակներում տեղի ունեցող սեմինարին: Հայ-թուրքական հարաբերությունների հիշատակման առիթ է դարձել ԱՄՆ-ի դեսպանի դիտողությունը, որը վերաբերում էր հայ-թուրքական հարաբերությունների կարգավորմանը:

Ընդգծելով, որ տվյալ ոլորտի մասնագետ չէ` Օնուր Սայլամը նկատել է, որ  Երեւանի եւ Անկարայի միջեւ հարաբերությունների կարգավորման ձեռնարկված գործընթացը անհրաժեշտ է դիտարկել որպես  խաղաղության, անվտանգության եւ  կայունության հաստատման  նկատմամաբ հետաքրքրության արտացոլանք: «Բոլորին հայտնի է, թե ինչպես են ստորագրվել արձանագրությունները եւ թե ինչ է հաջորդել դրանց: Գործընթացի տեղաշարժը կախված է տարածաշրջանի քաղաքական  պայմաններից»,-նշել է Թուրքիայի ներկայացուցիչը: Միաժամանակ նա անդրադարձել է գործընթացքում ԱՄՆ-ի  դերին` նկատելով, որ  անհրաժեշտ է, որպեսզի Միացիալ  Նահանգները շարունակի հարաբերությունների կարգավորման միջավայր ստեղծել, իսկ  գործընթացը պետք է բնական հունով ընթանա` առանց որեւէ «հրման»:

Հիշեցնենք, որ  Հայաստանի եւ Թուրքիայի միջեւ հարաբերությունների կարգավորման մասին արձանագրությունները ստորագրվել են 2009 թ-ի հոկտենբերի 10-ին Ցյուրիխում: Սակայն երկու երկրների խորհրդարաններում  արձանագրության վավերացումը թուրքական կողմի ոչ կառուցողական դիրքորոշման պատճառով կասեցվել է: