Ադրբեջանի հետ համատեղ Տրանսատլանտյան գազամուղի (TANAP) կառուցումը Թուրքիայի համար էներգետիկական ոլորտում ամենակարեւոր ռազմավարական քայլն է:  Այդ մասին հայտարարել է Թուրքիայի արտգործնախարար Ահմեդ Դավութօղլուն: Նրա խոսքով՝ «TANAP նախագծում Ադրբեջանի էներգապաշարները եւ Թուրքիայի աշխարհագրական դիրքը միավորվել են եւ ուժեղացրել առեւտրային հարաբերությունները»:

Դավութօղլուն նշել է, որ Ադրբեջանում արտասահմանյան ներդրումների մեծ մասը բաժին են ընկնում Թուրքիային: Միաժամանակ Ադրբեջանի ներդրումները Թուրքիայում վերջին ժամանակներս աճել են 80%-ով: Թուրքիայի եւ Ադրբեջանի միջեւ ապրանքաշրջանառությունը վերջին հինգ տարիներին աճել է հինգ անգամ:

Ներկայումս TANAP-ի  20%  մասնաբաժինը պատկանում է թուրքական BOTAS-ին, SOCAR-ին է պատկանում 80%-ը:  SOCAR-ը մտադիր է  իրեն թողնել նախագծի  51% մասնաբաժին: 20%-ը կմնա Թուրքիային, հայտնում է  «Ռոսբալտը»:

Հիշեցնենք, որ TANAP նախագիծը ենթադրում է գազամուղի շինարարություն Թուրքիայի արեւելյան սահմանից մինչեւ արեւմտյան սահման ադրբեջանական «Շահ Դենիզ» ծովային հանքավայրից Եվրոպա գազ առաքելու համար: TANAP-ի իրագործման միջկառավարական  համաձայնագիրը Ադրբեջանի եւ Թուրքիայի միջեւ ստորագրվել էր  հունիսի 26-ին: 

Գազամուղի նախնական թողունակությունը, ինչպես սպասվում է, կկազմի տարեկան 16 միլիարդ խմ: Շուրջ 6 միլիարդ խմ կմատակարարվի Թուրքիային, իսկ մնացածը՝ Եվրոպային: