Ռուսաստանի լրատվամիջոցները ներկայացնում են  մոսյկովյան պահեստներից մեկում առավոտյան տեղի ունեցած հրաձգության մանրամասները: Պարզվել է, որ մարդասպանը` Դմիտրի Վինոգրադովն այդ քայլին դիմելուց առաջ ցանցում հրովարտակ է տեղադրել: Փորձագետները նրան արդեն անվանել են ռուսական Բրեյվիկ:

Փաստաթուղթը ինտերնետում տեղադրվել է նոյեմբերի 7-ի առավոտյան: «Ես վստահ եմ, որ բավականաչափ հիմքեր ունեմ մարդկությանը` կենդանի օրգանիզմի քաղցկեղային ուռուցքի մակրո համանմանը համարելու համար. վերջինիս դերում  այս դեպքում հանդես է գալիս մեր մոլորակը»,-մարդասպանին մեջբերում է «Ուտրո.ru»-ն:Վինոգրադովը նամակի մեջ նշում է, որ գոյության ողջ ընթացքում  մարդկությունը մարտահրավեր է նետել  բնության օրենքներին : «Արդեն 2011 թ.-ի մարդկության թիվը հասել է  7 մլրդ, եւ դա այն դեպքում,  երբ Երկրի պաշարները վերջանում են»,-գրում է նա:

Վինոգրադովը նշել է, որ մարդկային կյանքի արդարացման միակ տարբերակը «որքան հնարավոր է շատ մարդկային կոմպոստ վերացնելն է»:

Հանցագործին ձերբակալել են հանցանքի վայրում, նա չի դիմադրել: Հաղորդվում է, որ  նա հարբած է եղել եւ ինքն է խոստովանել, որ խմել է 5 օր շարունակ:

Ռուսաստանի ամենանշանավոր դատական  հոգեբաններից մեկը` Միխայիլ Վինոգրադովը  հայտնել է, որ հանցագործն իրեն միանգամից հիշեցրել է  նորվեգացի Անդերս Բրեյվիկին, ով արյունահեղություն էր կազմակերպել  Ուտոյա կղզում եւ Օսլոյի կենտրոնում: