Վրաստանի իշխանությունները բացատրել են, թե ինչու է ձերբակալվել  պաշտպանության եւ ներքին գործերի նախկին նախարար Բաչո Ախալայան, ով «բանտային սկանդալից» հետո հրաժարական էր տվել: Ինչպես հայտնել է Վրաստանի գլխավոր դատախազ Արչիլ Կբիլաշվիլին, պաշտոնյան ձերբակալվել է զինծառայողներին ծեծի ենթարկելու համար:

Հիշեցնենք, որ Ախալայայից բացի ձերբակալվել են նաեւ  եւս երկու  պաշտոնյաներ`Վրաստանի  զինված ուժերի Միացյալ շտաբի պետ Գեորգի Կալանդաձեն եւ  4-րդ բրիգադի հրմանատար Զուրաբ Շամատավան:

Ինչպես փոխանցում է «Գրուզիա- Online»-ը, դատախազի խոսքով, միջադեպը տեղի է ունեցել  2011 թ.-ի հոկտեմբերին: Այն ժամանակ Ախալայան Կալանդաձեի եւ Շամատավայի հետ միասին ֆիզիկական եւ բանավոր վիրավորանքներ են հասցրել 6 զինվորականների: Նրանցից մեկին նախկին նախարարը դանակով հարվածել է գլխին:

Այնուհետեւ տուժածներին տեղափոխել են Վիզիանի, որտեղ շարունակել են նրանց ֆիզիկական  վիրավորանքների ենթարկել արդեն զինծառայողների շարքի առաջ: Դատախազը պարզաբանել է, որ ձերբակալությունը իրականացվել է հենց իրենց` ծեծի ենթարկվախծ զինծառայողների ցուցմունքի հիման վրա:

Ախալայայի փաստաբանը` Դավիթ Դեկանոիձեն  պաշտոնյաների ձերբակալության փաստարկները «աբսուրդային» է անվանել: Նրա խոսքով, Ախալայան եւ Կալանդաձեն անգամ չեն ճանաչում այն անձանց, որոնց ցուցմունքների հիման վրա նրանց ձերբակալել են:

Նախկին իշխող կուսակցության «Միասնական զգային շարժման» ներկայացուցիչները  պաշտոնյաների շուրջ ստեղծված իրավիճակը «քաղաքական դատաստան» են անվանել, որը ստեղծվել է նոր վարչապետ Բիձինա Իվանիշվիլիի եւ պաշտպանության նոր նախարար Իրակլի Ալասանիայի կողմից:

Իր հերթին վարչապետ Բիձինա Իվանիշվիլին հայտնել է, որ  ձերբակալությունների մեջ քաղաքական դրդապատճառներ չի տեսնում: Ելնելով հանրության շրջանում ստեղծված բարձր հետաքրքրությունից` նա խոստացել է ուշադիր հետեւել այս գործին: