նախընտրելի դարձնել
Նահանգներում ընտրեցին նոր նախագահի, հիմա էլ պատրաստվում են նոր փոթորկի:
Ամերիկյան ավիաընկերությունները հետաձգել են դեպի Նյու Յորք եւ այնտեղից կատարվող բոլոր չվերթները: United Airlines-ը հետաձգել է 500 չվերթ՝ սկսած նոյեմբերի 7-ի կեսօրից:
American Airlines եւ American Eagle ընկերությունները Նյու Յորքում հետաձգել են 290 չվերթ եւ Ֆիլադելֆիայում աշխատանքները դադարեցրել են մինչեւ նոյեմբերի 8-ը:
Սպասվում է, որ «Նոսիսթեր» փոթորիկը բերելու է տեղատարափ անձրեւներ, հետո նաեւ՝ ձյուն, ուժեղ քամիներ եւ սառնամանիք: Չնայած որ նոր փոթորիկն ուժգնությամբ զիջում է «Սենդիին»՝ այն վտանգավոր է արդեն վնասված շինությունների համար: Բացի դրանից, հազարավոր մարդիկ դեռեւս մնում են առանց էլեկտրականության:
Ինչպես հայտնում է «pravda.ru»-ն, Նյու Յորքում տարերքի պատճառով կրկին տարհանվել են մի քանի թաղամասեր: Նյու Յորքի քաղաքապետ Մայքլ Բլումբերգը հրահանգել է 24 ժամով փակել բոլոր լողափերը եւ քաղաքային այգիները: Ըստ նրա՝ իշխանությունները չեն պատրաստվում փրկարարներին ծով ուղարկել «ինչ-որ մեկի հիմարության պատճառով»: Հարեւան Նյու Ջերսի նահանգում նախորդ աղետից տուժած բնակիչների համար տարհանումը պարտադիր է:
«Սենդի» փոթորիկը ստիպել է անորոշ ժամկետով փակել Ազատության արձանը եւ Էլիս կղզին, որի կողքին գտնվում է Նյու Յորքի խորհրդանիշը: Հուշարձանը փոթորկից չի տուժել, սակայն Լիբերթի եւ Էլիս կղզիների տարածքը ներկայումս ողողված է ջրով, իսկ էլեկտրամատակարարումը դեռեւս չի վերականգնվել:
