Ջորջիա նահանգի շուրջ 4 հազար բնակիչ  Կոնգրեսի ընտրություններում քվեարկել է գիտնական Չարլզ Դարվինի օգտին: Դարվինի անունն իրենց ձեռքով են ավելացրել քվեաթերթիկներում: 

Մարդկության զարգացման Էվոլյուցիոն տեսության հեղինակի օգտին զանգվածային քվեարկությունը հանրապետական կոնգրեսմեն Փոլ Բրոունի դեմ բողոքի դրսեւորում էր, որն  առաջադրվել էր 10-րդ ընտրատարածքում: Ընտրություններից որոշ ժամանակ առաջ իր համակիրների հետ տեղական եկեղեցիներից մեկում հանդիպման ժամանակ նա հայտարարել էր, որ Դարվինի  ուսմունքները «հենց դժոխքից եկող սուտ են», պարզաբանում է The Washington Post-ը:

Շրջանի բազմաթիվ բնակիչներ հանրապետականին մեղադրել են  խավարամոլության մեջ եւ օպերատիվ հասարակական ընդդիմություն են ստեղծել, որը  գործողությունների ծրագիր էր մշակել: Ընտրությունների օրը ընտրողների մի մասն անձամբ քվեաթերթիկում Բրոունի անվան կողքին գրել էր Չարլզ Դարվինի անունը եւ դիմացը նշում արել:

Արդյունքում անգլիացի գիտնականի օգտին քվեարկել էր 4 հազար մարդ, գրում է «gazeta. ru»-ն:

Մինչդեռ, չնայած Ջորջիայի բնակիչների դժգոհությանը, Բրոունին հաջողվել է  վերընտրվել Կոնգրեսի Ներկայացուցիչների պալատում: Հատկանշական է, որ իր շրջանում նա առաջադրվել էր ոչ այլընտրանքային հիմունքով. մրցակից չի ունեցել: