նախընտրելի դարձնել
Ռուսաստանի նախագահ Վլադիմիր Պուտինը պաշտպանության նախարարությունում մի շարք նշանակումներ է կատարել: Նա ստորագրել է Գլխավոր շտաբի պետ Նիկոլայ Մակարովի հրաժարականի դիմումը:
Գլխավոր շտաբի նոր պետ է նշանակվել գեներալ-գնդապետ Վալերի Գերասիմովը, ով նաեւ նախարարի առաջին տեղակալը կլինի: Ավելի վաղ Գերասիմովը ղեկավարում էր Կենտրոնական ռազմական շրջանի զորքերը: Արեւմտյան ռազմական շրջանի նախկին ղեկավար Արկադի Բախինը նույնպես նախարարի առաջին տեղակալ է դարձել: Տեղակալի պաշտոնն ստացել է Օլեգ Օստապենկոն: Ավելի վաղ նա օդատիեզերական պաշտպանության զորքերի հրամանատարն էր, գրում է «Էխո Մոսկվի»-ն:
Ինչպես գրում է «vesti.ru»-ն, այն, որ պաշտպանության նախարարի պաշտոնում Սերգեյ Շոյգուի առաջին որոշումներից մեկը Գլխավոր շտաբի ղեկավարի փոփոխությունն էր լինելու, ոչ ոքի համար կասկածի ենթակա չէր: Նախկին ղեկավար Նիկոլայ Մակարովը ռազմական բարձր ղեկավարությունում այն քչերից էր, որը հենց սկզբից աջակցել էր Անատոլի Սերդյուկովի՝ ռազմական ոլորտում անցկացրած «բարեփոխումներին», ինչի շնորհիվ էլ ստացել էր իր պաշտոնը: Մակարովին նախկին նախարարի աջ ձեռքն էին համարում, այդ պատճառով էլ նրա հեռացումը կանխորոշված էր:
Հիշեցնենք, որ գերատեսչությունում փոփոխությունները կապված են նախարարի փոփոխության հետ: Անատոլի Սերդյուկովը ֆինանսական սկանդալի պատճառով պաշտոնը զիջել էր Սերգեյ Շոյգուին:
