Վրաստանի ԶՈՒ Միավորված շտաբի ղեկավարի ժամանակավոր պաշտոնակատար է նշանակվել Վախթանգ Կապանաձեն, գրում է «Գռուզիա օնլայնը»՝ վկայակոչելով Վրաստանի ՊՆ մամուլի ծառայությանը:

Որոշումը կայացվել էր այն բանից հետո, երբ Թբիլիսիի քաղաքային դատարանը դատախազության միջնորդությամբ  դադարեցրել էր ԶՈՒ Միավորված շտաբի ղեկավար Գեորգի Կալանդաձեի եւ հետեւակային 4-րդ բրիգադի հրամանատար Զուրաբ Շամատավայի լիազորությունները:

Հիշեցնենք,  նոյեմբերի 10-ին Վրաստանի նախագահ Միխայիլ Սահակաշվիլին ընդունել էր գրավի դիմաց ազատ արձակված Կալանդաձեին եւ կարգադրել էր շարունակել  պարտականությունների կատարումը: Սահակաշվիլին հանդիպման ընթացքում նշել էր, որ զինված ուժերը ծառայում են  ոչ թե ինչ-որ կուսակցությանը, կառավարությանը կամ նախագահին, այլ վրաց ժողովրդին:

Կալանդաձեն եւ Շամատավան, որոնք մեղադրվում են  պաշտոնական  դիրքի չարաշահման մեջ, 20 հազար լարի (12 հազար դոլար) գրավի դիմաց նոյեմբերի 9-ին ազատվել էին: Միաժամանակ, բանտարկված է մնում Վրաստանի ՆԳ  եւ պաշտպանության նախարար Բաչո Ախալայան: 

Ախալայան, Կալանդաձեն եւ Շամատավան  ձերբակալվել էին նոյեմբերի 7-ի գիշերը:  Բոլոր երեքին պաշտոնական  դիրքի չարաշահման մեղադրանք էր ներկայացվել: Նախկին նախարար Բաչո Ախալայային նաեւ «ապօրինի ազատազրկման» մեղադրանք էր ներկայացվել: