նախընտրելի դարձնել
«Ռոսկոսմոսը» կառավարությանն իրազեկում է ուղարկել «Ռուսական տիեզերական համակարգերի» (ՌՏՀ) գլխավոր տնօրեն Յուրի Ուրլիչիչին պաշտոնից ազատելու վերաբերյալ: Նախորդ շաբաթ նրան հեռացրել էին Գլոբալ նավիգացիոն արբանյակային համակարգի (ԳԼՕՆԱՍՍ) գլխավոր կոնստրուկտորի պաշտոնից: Այդ մասին «Սոյուզ» տիեզերանավի բարեհաջող վայրէջքից հետո կայացած մամուլի ասուլիսում հայտնել է «Ռոսկոսմոսի» ղեկավար Վլադիմիր Պոպովկինը:
Կադրային որոշումները կայացվել էին, երբ հայտնի էր դարձել բյուջեից 6,5 միլիարդ ռուբլի յուրացումների մասին, որոնք հատկացվել էին ԳԼՕՆԱՍՍ-ի համար: Հետաքննությունն սկսվել էր դեռեւս երկու տարի առաջ, սակայն դրա մանրամասները պարզվել են միայն վերջերս:
«Ռոսկոսմոսի» ղեկավարը նշել է, որ վերջին որոշումները կայացվել են, «որպեսզի ոչ ոք չխանգարի քննչական գործողություններին»:
Տիեզերական գերատեսչության ղեկավարը հայտնել է, որ ԳԼՕՆԱՍՍ-ի համար հատկացված փողերի յուրացման մասին ինքն իմացել է նախորդ տարի:
Հիշեցնենք, որ ավելի վաղ փոխվարչապետ Սերգեյ Իվանովը հայտարարել էր, որ այդ մասին իմացել է դեռեւս 2010-ին, հայտնում է ԻՏԱՌ-ՏԱՍՍ-ը:
Նախորդ շաբաթ Մոսկվայի մետրոպոլիտենի ներքին գործերի վարչության ղեկավար Իգոր Բոժկովը, որը մինչեւ այս տարվա հուլիսի վերջն աշխատել է հետաքննությունը վարող ՌԴ ՆԳՆ-ի քրեական հետախուզության բաժնում, լրագրողներին հայտնել էր, որ ոստիկանությունը 6,5 միլիարդ ռուբլու յուրացում է բացահայտել:
