Մարսի մակերեւույթին ճառագայթման մակարդակը, որը գիտնականները համարում էին Կարմիր մոլորակ մարդու վայրէջքի արգելքներից մեկը,  իրականում համեմատելի է Երկրի  ստորին ուղեծրի ճառագայթմանը: Այդ մասին են վկայում Curiosity մարսագնացի չափումների տվյալները:

Բուլդերի (Կոլորադո) Հարավարեւմտյան հետազոտական ինստիտուտի ներկայացուցիչ Դոն Հասլերը հայտարարել է, որ աստղագնացները կարող են ապրել այդ պայմաններում: Հասլերը Curiosity-ի վրա հաստատված ճառագայթման ֆոնի տվյալների հետազոտման առաջատար ուսումնասիրողն է, հայտնում է dni.ru-ն:

Երկիր մոլորակի բնակիչներին ճառագայթումից պաշտպանում է մագնիսական հզոր դաշտը, որը Մարսը չունի: Հենց այդ փաստն էր ստիպել գիտնականներին կասկածել,  թե կարող է արդյոք աստղագնացն ապրել Կարմիր մոլորակում վայրէջք կատարելու դեպքում: Սակայն վերջին ուսումնասիրությունները ցույց են տվել, որ Մարսի մթնոլորտը ազդեցիկ պատնեշ է տիեզերքի վտանգավոր արագաշարժ մասնիկների համար: 

Հասլերն ընդգծել է, որ ստացված արդյունքները նախնական են, քանի որ նախատեսված երկու տարվա առաքելությունից Curiosity-ն Մարսի մակերեւույթի ուսումնասիրությամբ միայն երեք ամիս է զբաղվել: Մոլորակի վրա ճառագայթման մակարդակի ճշգրիտ թվերը կհաստատվեն ավելի ուշ, հավելել է նա: