Լեհաստանի հատուկ ծառայությունները հայտնել են խոշոր ահաբեկչության կանխման մասին, որը պետք է տեղի ունենար երկրի Անկախության օրը՝ նոյեմբերի 11-ին: Հարձակման ենթադրյալ թիրախներն էին Վարշավայում Լեհաստանի Սեյմի շենքը, խորհրդարանի պատգամավորներ, կառավարության անդամներ եւ նախագահ Բրոնիսլավ Կոմորովսկին: Ահաբեկչությունը նախապատրաստական փուլում բացահայտել է  Լեհաստանի ներքին անվտանգության գործակալությունը:

Ռումբը պետք է տեղադրվեր Սեյմի մոտ կայանված մեքենաներից մեկում:

Տվյալ գործով ձերբակալվել է Կրակովի գյուղատնտեսական համալսարանի  45-ամյա աշխատակիցը: Նա  հանգամանորեն պատրաստվել էր ահաբեկչությանը: Նրա հետ փորձարկումներ էին կատարել եւս չորս մարդ: Նրանցից երկուսն արդեն  ձերբակալվել են, գրում է «Կոմերսանտը»:

Ահաբեկչության գլխավոր կազմակերպչի տանը հայտնաբերել են տարբեր  հանցանշաններ, այդ թվում՝ ռումբերի դետալներ, դետոնատորներ, հրազենային զենք եւ զինամթերք: Այդ ամենը գնված են եղել Լեհաստանի ապօրինի շուկաներից եւ արտասահմանից: Կրակովի ձերբակալված բնակիչը զենք պահելու իրավունք չի ունեցել: